Policia arrestoi mbrëmjen e djeshme autorin e vjedhjes së një argjendarie në Elbasan. Ai është 27-vjeçari Astrit Thaçi i cili siç njofton policia është përgjegjës për 8 vjedhje të tjera.
I dënuar më parë me 7 vite burg në Itali për vjedhje me armë, 27-vjeçari ishte kthyer në një problem të vërtetë për rendin në qytetin e Durrësit, Tiranës dhe Elbasanit. Rezulton se nga data 8 shkurt deri mbrëmjen e djeshme ai ka kryer 8 grabitje me armë.
Astrit Thaçi rezulton banues në Durrës. Aty ai fillimisht ka grabitur filialin e një banke të nivelit të dytë më pas ka plagosur një person në tentativë grabitjeje. Në datën 11 shkurt, ai ka grabitur një pikë supermarketi dhe më pas ka lëvizur në Tiranë. Aty ka vijuar serialin e grabitjeve. Nën kërcënimin e armëve ai ka grabitur një pikë agjencie turistike dhe dy supermarkete. Ditën e djeshme ai u raportua se kishte grabitur një argjendari në Elbasan, por më parë i kishte marrë me forcë një personi 300 euro dhe aparatin celular.
Ne momentin e kapjes, këtij shtetasi iu gjetën dhe sekuestruan 17 varëse floriri, dy ora dore floriri, 20 byzylykë floriri dhe 51,700 lekë të reja.
Materialet procedurale do t’i referohen Prokurorisë së Rrethit Gjyqësor Durrës, Tiranë dhe Elbasan, për veprën penale “Vjedhja me armë, e mbetur në tentativë”, “Plagosja e rëndë me dashje”, Vjedhja me dhunë” dhe “Vjedhja e bankave dhe arkave të kursimit”. /Opinion.al
