Federata e Futbollit të Kosovës ka njofuar se ndeshja mes Lincoln Red Imps dhe Prishtinës, e parashikuar të zhvillohej sot (e martë) ora 18:00, është anuluar pak para fillimit, pasi 8 futbollistë të Prishtinës dolën pozitiv në testet e Covid-19, në rezultatet e paraqitura nga laboratori i licencuar nga UEFA në Spanjë.
Edhe pse skuadra e Kosovës pranoi të luante ndeshjen me futbollistët që kishte në dispozicion dhe sipas rekomandimeve nga UEFA, autoritetet e Gjibraltarit e refuzuan këtë mundësi.
“FFK konsideron që kjo ndeshje është dashur të luhet dhe do t’i qëndrojë përkrah klubit të Prishtinës që vendimi i UEFA-s të jetë i drejtë dhe i arsyeshëm dhe të mos jetë në dëm të klubit tonë. Ne, si federatë dhe klubet tona jemi në situatë të palakmueshme, duke pasur parasysh faktin se UEFA nuk e ka licencuar asnjë laborator për kryerjen e testeve për Covid-19 në Kosovë, teksa në vendet fqinje ku janë të licencuar laboratorët e tillë nuk është e mundshme lëvizja për shkak të mbylljes së kufijve. Po ashtu, është e çuditshme se si rezultuan 8 futbollistë pozitiv, kur para nisjes për në Gjibraltar në testet e kryera nga IKSHPK të gjithë futbollistët kanë rezultuar negative”, thuhet në njoftimin e federatës kosovare.
Lidhur me fatin e ndeshjes së anuluar, federata thotë se shpreson në një vendim të merituar.
“FFK shpreson që kësaj radhe organet e UEFA-s do të jenë më vigjilente dhe do ta kenë parasysh situatën në të cilën ndodhemi në pandemi dhe në fund do të marrin vendim të merituar, duke pasur parasysh se FC “Prishtina” ishte pro zhvillimit të ndeshjes dhe kishte numër të mjaftueshëm të futbollistëve të gatshëm për lojë”, bën me dije federata në njoftimin e saj./Opinion.al
