Në legjislaturën e 11-të të parlamentit shqiptar do të ulen në karrige 72 deputetë të rinj, si nga shumica, ashtu dhe partitë e opozitës. Deputetët që marrin një mandat për herë të parë, më së shumti janë prurje të Partisë Socialiste. Plot 53 nga 83 mandate që do të ketë prej Shtatorit kjo forcë, ku 46 e kishin vendin e sigurt në listat e kandidatëve, ndërsa të tjerët bënë një betejë të ashpër brenda llojit, kuti më kuti, e fletë më fletë.
Nga Partia Demokratike, që u tkurr në 50 mandate, vetëm 6 emra erdhën nga vota preferenciale, mes të cilëve vetëm një grua. Jorida Tabaku, e cila do të jetë deputete e Tiranës edhe për një mandat tjetër 4-vjeçar.
Nga partitë e tjera rikthehet në parlament Tom Doshi, i Partisë Socialdemokrate. 2 deputetët e tjerë janë emra të rinj. Nga Mundësia, që fitoi 2 mandate, rikthehet në parlament kryetari Agron Shehaj dhe një tjerët deputet në Tiranë. Ndërsa 2 forcat e tjera do të ulin për herë të parë secila nga 1 deputet.
Jashtë parlamentit mbetet për herë të parë nga 1992, duke mos llogaritur mungesën 1-vjeçare 1996-1997, Pandeli Majko, deputet për 9 legjislatura. Por edhe 42 kolegë të tij socialistë, me 1 ose me më shumë mandate.
Në radhët e koalicionit të PD, afro gjysma nga deputetet aktual do të ulen sërish në parlament. Në parlamentin e ri deputetët me më shumë mandate, janë nga radhët e demokratëve: Sali Berisha dhe Tritan Shehu, të zgjedhur për herë të parë në zgjedhjet e 31 Marsit 1991. Ndërsa nga socialistët, deputeti me më shumë mandate, që do të vijojë të jetë ligjvënës nga 9 Shtatori, kur nis sesioni i ri parlamentar, është Erjon Braçe. TvKlan
