Cikloni “Idai”, i cili goditi disa nga zonat e Afrikës së Jugut ka shkaktuar vdekjen e 700 personave. Pas fatkeqësisë natyrore, tashmë vendi është përfshirë dhe nga epidemi të ndryshme vdekjeprurëse.
Banorët e këtyre zonave janë nën kërcënimin e epidemive si malarja dhe kolera. Rastet e para janë evidentuar në qytetin e varfër portual të Bejrës.
Ndërkohë, pritet që numri pacientëve të prekur nga epidemitë të rritet në ditët ne vijim. Sëmundja në zonë mendohet të jetë përhapur nga përmbytja e puseve të ujit, të cilat për shumë banorë të fshatrave mbeten burimi kryesor i ujit të pijshëm.
Një nga mjekët e spitalit të Bejrës është shprehur se presin rreth 100 deri në 200 persona të prekur nga epidemitë, të cilat mund të rezultojnë fatale për pacientët.
“Sot presim rreth 100 apo 200 persona me heqje akute të barkut, e cila mund të jetë një nga simptomat e sëmundjes. Në total kemi trajtuar rreth 2,700 raste. Sigurisht që numri i pacientëve do të rritet pasi kolera është një epidemi, por po punohet intensivisht që të ofrohet ujë i pijshëm i pastër për banorët dhe të parandalohet përhapja e sëmundjes.“/ Opinion.al E.Xh.
