Në Tiranë janë shtatë xhami që janë jashtë kontrollit të Komunitetit Mysliman të Shqipërisë.
Nënkryetari i KMSH-së, Ali Zaimi deklaron se këto xhami janë kryesisht në rrethina dhe se ato janë të pavarura financiarisht nga institucioni qendror.
Sipas tij, ka tendenca për rekrutimin e besimtarëve për t’i dërguar në Siri.
“KMSH është institucion i pavarur nga shteti, ka bashkëpunim me shtetin por duhen pasur parasysh edhe mundësitë tona të kufizuara sidomos financiare që nuk na lejojnë të mbulojmë të gjithë vendin me punonjës, të kemi dhe aq mundësi kontrolli. Çështja financiare është në krye të listës së problemeve”, tha numri dy i KMSH-së.
Duke folur për Shtetin Islamik, Zaimi deklaron se ai është kancer për botën islame. Ai nënvizon se vuajtjet më të mëdha po u shkaktohen vetë myslimanëve.
“ISIS kancer për botën islame, një e keqe më e madhe që po i bën të keqen më të madhe islamit, se po shkatërrojnë imazhin e islamit, duke e vendosur në një linjë me terrorizmin. Në një tragjedi e para që njerëzit duhet të bëjnë, mos të bëjnë paralelizma, jo pse ndodhi aty pse ndodhi këtu, ai është një njeri s’ka rëndësi i krishterë apo mysliman, dhe ka nevojë për solidarizim. Terrori nuk mund të ketë lidhje me fenë. Ata që ndërmarrin veprime të tjera, janë njerëzit më të ulët, më të poshtër. Ne duhet t’i dënojmë pa asnjë ekuivok, pa asnjë por”, u shpreh nënkryetari i KMSH-së për “Raport Tv”.
