Një djalë 7-vjeçar u vra, në Florida të Shteteve të Bashkuara të Amerikës, pasi një sherr mes disa personave, përfundoi në përdorimin e armëve të zjarrit.
Departamenti i Policisë së Tampës tha se oficerët iu përgjigjën të shtënave me armë përgjatë rrugës Courtney Campbell në perëndim të Ben T. Davis Beach. Kur oficerët mbërritën ata u tronditën kur gjetën një djalë 7-vjeçar me një plagë me armë zjarri në kokë dhe gjyshin e tij që kishte marrë një plagë me armë zjarri në dorë.
Dëshmitarët thanë se djali u dërgua me urgjencë në spital, por fatkeqësisht nuk mundi t’iu mbijetonte plagëve të marra.
Po ashtu ata u thanë oficerëve se një sherr fillimisht verbal nisi mes dy grupeve njerëzish pasi thuhet se dikush po ngiste në mënyrë të pakujdesshme një motor uji pranë vendit ku fëmijët po luanin. Sherri arriti kulmin kur disa anëtarë të secilit grup filluan të qëllonin kundër njëri-tjetrit.
Policia thotë se gjatë të shtënave, gjyshi po tentonte të mbronte nipin e tij 7-vjeçar , por të dy u qëlluan.
Hetuesit besojnë se plumbi që ka goditur dorën e gjyshit, është i njëjti plumb që ka goditur fëmijën në kokë.
“Unë jam i sigurt se fëmija i vogël nuk ishte objektivi i synuar. Por, kur njerëzit janë të pakujdesshëm me armët e tyre të zjarrit dhe e lënë zemërimin t’i pushtojë, ndodhin ngjarje të tilla,” tha Calvin Johnson, Zëvendës Shefi i Hetimeve dhe Mbështetjes.
.
