Për protestën marshim të opozitës janë 7 të arrestuar dhe 22 të proceduar. Policia e Tiranës thotë se gjatë zhvillimit të protestës, pjesëmarrësit në tubim kanë kundërshtuar, goditur me mjete të forta, fishekzjarrë, tymuese efektivët, të cilët kanë qenë të planizuar me shërbim.
“Nga goditjet, kundërshtimet dhe përdorimi i lëndëve piroteknike, sendeve të forta kanë mbetur të plagosur 3 punonjës të Policisë, të cilët morën ndihmën e parë pranë spitalit të Traumës dhe QSUT”, thekson policia ndërsa sipas tyre ka dhe dëme të konsiderueshme materiale.
“Grupi hetimor po vijon punën për identifikimin e personave të tjerë të dyshuar për kryerjen e veprimeve të kundraligjshme në këtë protestë të dhunshme“.
Për afro tre orë opozita protestoi sërish në Tiranë për largimin e Kryeministrit Rama dhe krijimin e një qeverie tranzitore. Ndryshe nga manifestimet antiqeveritare, tubimi i së hënës ishte konceptuar si një protestë marshim që nisi përpara Kryeministrisë.
Pas Bulevardit “Dëshmorët e Kombit”, marshimi i opozitës vijoi përpara Drejtorisë së Përgjithshme të Policisë, ku protestuesit hodhën një numër të konsiderueshëm kapsollash.
Ndalesa e radhës ishte selia e Parlamentit. Edhe këtu u shënuan disa incidente të vogla. Krahas hedhjes së kapsollave, protestuesit hoqën barrierat metalike që kishin rrethuar perimetrin e jashtëm të godinës së Kuvendit.
Pas parlamentit, protestuesit, të udhëhequr nga Lulzim Basha, marshuan përpara Ministrisë së Brendshme. Protesta marshim e opozitës u përmbyll në Drejtorinë e Policisë së Tiranës, aty ku mbahen ende të shoqëruar disa protestues, që sipas uniformave blu, përdorën dhunë në tubimin e 11 Majit./ Opinion.al
