Kryeministri Edi Rama në ritin e 7 Marsit mblodhi mësueset në selinë e qeverisë për ti përgëzuar dhe uruar. Por kësaj radhe ai kishte edhe disa fjalë “të ndjera”. Rama u kërkoi ndjesë mësueseve pasi politikanët nuk po ndihmojnë në edukimin e brezit të ri, dhe për këtë ai solli në vemendjen fjalorin e përdorur në seancat plenare. Por mësueset e dinë mirë se kur kërkohet ndjesë, gabimi nuk duhet të përsëritet. A do ta mbajë fjalën kryeministri?
Kjo pritet për tu parë në vazhdim, ndërsa e publikojmë të plotë ndjesën e tij përpara mësuesve.
“Nuk besoj se është e tepërt që unë sot t’ju kërkoj ndjesë të gjithave ju dhe nga të gjithë mësuesit e Shqipërisë. Një ndjesë të thellë dhe të vërtetë, për faktin që unë dhe raca ime e politikanëve, sidomos e atyre që çdo të enjte zhvillojnë mësim në Kuvendin e Shqipërisë, nuk ju ndihmojmë aspak në kryerjen e misionit tuaj thelbësor që është jo vetëm të përgatisni njerëz të ditur, por të edukoni qytetarë të mirë. Dhe jo vetëm që nuk ju ndihmojmë aspak, por akoma më keq ju pengojmë çdo të enjte rregullisht, në kryerjen e misionit tuaj. Edhe ditët e tjera, patjetër, por sidomos të enjten. Shfaqja e të enjtes, rrëzon të gjitha fjalët që ne mund të themi gjatë javë në raport me kultivimin e virtyteve dhe dhuntive të mira. Sidoqoftë duke qenë në këtë detyrë unë kam edhe mundësinë e madhe që të ditët e tjera të laj me sa më shumë punë dhe kontribut, në mbështetjen tuaj dhe të të gjithë të tjerëve mëkatet e ditës së enjte”, tha Rama.
