Kjo e shtunë përkon me festën e 7 Marsit, e njohur ndryshe si një ditë kushtuar mësuesve shqiptarë, ku vlerësohet kontributi i tyre për edukimin e brezave.
Kjo datë u zyrtarizua në vitin 1960 si “Dita Kombëtare e Mësuesve”, në përkujtim të çeljes së Mësonjëtores së parë shqipe më 7 Mars të vitit 1887, në qytetin e Korçës. Mësenjëtorja u krijua në kushtet e pushtimit otoman, nga një grup rilindasish, ndërsa ishte e para shkollë fillore me një fizionomi të theksuar kombëtare dhe laike, ku të gjitha mësimet jepeshin në gjuhën shqipe.
Mësonjëtorja kishte fillimisht 35 nxënës me 4 klasa mësimi dhe 1 klasë përgatitore. Lëndët ishin shkrimi, këndimi, gramatika e gjuhës shqipe, historia, gjeografia, aritmetika, dituria natyrore dhe edukimi fizik.
Drejtuesit e parë të shkollës qenë patriotët e Rilindjes sonë Kombëtare, Pandeli Sotiri, Petro Nini Luarasi, Nuçi Naçi, etj, ndërsa drejtor i parë i saj u zgjodh Petro Nini Luarasi, një nga figurat kryesore të kohës, veprimtar i Rilindjes Kombëtare shqiptare, publicist dhe pedagog.
Mësonjëtorja e parë shqipe “mbijetoi” për 15-vite, ku përballoi pengesat dhe vështirësitë e nxjerra nga pushtuesit otomanë. Rëndësia e krijimit të kësaj shkolle qëndron në faktin se ajo institucionalizoi mësimin e gjuhës shqipe në Shqipëri dhe krijoi një plejadë njerëzish, të cilët u bënë më vonë veprimtarë të lëvizjes për çlirim kombëtar dhe shoqëror të vendit.
Një urim i veçantë ka ardhur sot edhe nga presidenti i Republikës, i cili falenderon në mënyrë të veçantë mësuesen e tij të parë, Lenin dhe mësueset tek “Kongresi i Lushnjës”, “Fan Noli” dhe “Sami Frashëri”, si dhe të gjithë profesorët e pedagogët. Presidenti shpreh mirënjohje për gjeneratat e mësueseve shqiptarë dhe sakrificat e tyre.
Mësuesit kanë marrë një urim dhe nga kryeministri Edi Rama, i cili, duke cituar Konfucin shkruan se; “Vlera e mësuesit dhe pesha e qiellit nuk maten kurrë”.
