Kreu i Partisë së Lirisë, Ilir Meta, ka reaguar në lidhje me një raport të Kontrollit të Lartë të Shtetit, i cili thotë se pajisjet me defekt kanë bërë që 600 gra me tumor nuk e kanë marrë shërbimin me radioterapi, duke rrezikuar shëndetin e tyre.
Përmes një statusi në “Facebook”, Meta shkruan se ky është një krim i vërtetë ndaj jetës dhe shëndetit, dëshmitarë të të cilit janë pacientët e shumtë, por edhe shumë familjarë të tyre.
Më tej kreu i PL, hedh akuza të rënda duke thënë se babëzia korruptive me koncesionet nuk kursen as jetën e njerëzve.
“Koncesionet korruptive në shëndetësi privojnë pacientët nga shërbimi shëndetësor në onkologji.
Shpërdorimi kolosal i fondeve në shëndetësi me koncesionet korruptive ka krijuar mungesa dhe boshllëqe shumë kritike në shërbime dhe përkujdesje mjekësore ndaj qindra pacientëve të tjerë në shërbimin e onkologjisë.
Është fakt shumë tronditës mostrajtimi i 600 grave paciente me CA gjinekologjik me radioterapi, si dhe mostrajtimi i 200 pacientëve me radioterapi, që vuajnë nga tumoret e lëkurës.
Kjo situatë kaq e rëndë e konstatuar nga Kontrolli i Lartë i Shtetit do të thotë që jeta dhe shëndeti i pacientëve të mbetet në mëshirë të fatit dhe pa trajtim mjekësor.
Ky është një krim i vërtetë ndaj jetës dhe shëndetit, dëshmitarë të të cilit janë pacientët e shumtë, por edhe shumë familjarë të tyre.
Babëzia korruptive me koncesionet nuk kurseu pra as jetën e njerëzve.
Drejtësia të veprojë ndaj përgjegjësve sepse korrupsioni i tyre ka krijuar dëm pa kthim siç është humbja e jetës dhe dëmtimi i shëndetit”-shkruan Meta.
