Lëvizja Europa Tani e Presidentit Jakov Milatoviç ka fituar zgjedhjet e parakohshme parlamentare të Malit të Zi. Kjo parti ka arritur që të sigurojë 26 përqind të votave ose 23 mandate deputetesh, ndjekur nga Aleanca Së bashku me kryesuese DPS-në e ish-presidentit Gjukanoviç me 22 mandate, koalicioni Për të ardhmen e Malit të Zi me 13 mandate dhe koalicioni Demokratë dhe Ura e Dritan Abazoviç me 11 mandate.
Dy listat e shqiptarëve në këto zgjedhje kanë prodhuar 3 mandate deputetësh. Genci Ninambegu do të jetë përfaqësues i Aleancës Shqiptare ndërsa Forumi Shqiptar do të përfaqësohet nga Nik Gjeloshaj dhe Nikola Camaj. Në parlament do të shkojnë edhe tre shqiptarë të tjerë. Mehmet Zenka dhe Drita Lola përfaqësojnë partinë e ish-presidentit Milo Gjukanoviç ndërsa përkrah tyre do të jetë edhe shqiptari tjetër, Dritan Abazoviç, koalicioni i të cilit siguroi 11 deputetë.
Roli i partive shqiptare për të krijuar qeverinë e re të Malit të Zi e cila kërkon mbështetjen e të paktën 41 deputetëve nga 81 që ka parlamenti mbetet shume i rëndësishëm.
Pjesëmarrja në zgjedhje ishte e ulët vetëm 56.7% ndërsa dy muaj më parë në zgjedhjet presidenciale i kaloi 70%.
