Në një kohë kur fushata zgjedhore për 6 marsin ende nuk ka nisur zyrtarisht, duket se forcat politike kanë ndezur “motorët” para kohe.
Pas PD në Dibër dhe ish-kryeministrit në Sukth, PS në Durrës kanë dalë në terren dhe po nisin takimet me elektoratin për të kërkuar vota për kandidaten, Emirjana Sako.
Duket se në Durrës Sako ka edhe mbështetjen e ish-kryebashkiakut të Durrësit Vangjush Dako. Në disa foto të publikuara në media Dako shihet në mesin e disa personave.
Takimi me socialistët është zhvilluar të shtunën në njësinë administrative numër 6. Dako zgjodhi që të mos kandidonte për kryetar bashkie në zgjedhjet e 2019-ës, ku PS, thuajse nuk kishte asnjë parti tjetër politike përballë.
Këtë moskandidim, kryeministri Edi Rama e justifikoi duke thënë se ishte zgjedhje personale e ish-kryebashkiakut.
