Pas koalicionit me lëvizjen e ish-kryeministrit, Sali Berisha, kryetarja e LSI, Monika Kryemadhi ka vijuar sulmet ndaj kreut të PD-së Lulzim Basha për të cilin ka thënë se e ka cilësuar si armik pasi në zgjedhjet e 25 prillit i ka hequr mandatet LSI dhe ia ka dhënë Partisë Socialiste.
“Një aleat armik e keni cilësuar Lulzim Bashën? Patjetër një aleat armik, mjafton të shikoni procesverbalet e grupeve të numërimit të Partisë Demokratike në 25 prill. I hiqet mandate Elona Gurit i jepet Edi Ramës. I hiqet mandate Ardit Çelës i jepet Blendi Klosit, i hiqet mandati Endrit Braimllarit i jepet Niko Peleshit. Mjafton kjo për të kuptuar sesi mandatet i hiqen LSI dhe i shiten Partisë Socialiste. LSI nuk ka ndërmend të luftojë për të shkuarën por të mësojë nga e shkuara”, është shprehur Kryemadhi.
Më tej ajo tha në një intervistë televizive se Lulzim Basha duhet të nxjerrë kandidatët për zgjedhjet e pjesshme lokale të 6 Marsit.
“Të nxjerrë kandidatët një here se nuk ka nxjerrë kandidatët. Afatet e fundit këto ditë janë. 6 shkurti është afati i fundit. Të mendosh që ka 10 vjet për primare dhe ende nuk ka hedhur emrat. Apo po bën sondazhe një listë apo dy lista. Është traditë e përhershme, është traditë që i mban gjërat në momentin e fundit. Unë shpresoj që të marrë pjesë në zgjedhjet e 6 marsit po mos u çudisni kur të thotë që nuk bëhem pjesë e ‘Trekëndëshit të Bermudës’ dhe nuk marr pjesë në zgjedhjet e 6 marsit, sepse kam përshtypjen që rezultatet do të jenë komplet ndryshe.
E pyetur nëse mendon se Lulzim Basha nuk do të hyjë në garë, Kryemadhi u përgjigj: “Po këtë punë ka bërë gjithmonë. Nuk na futi në zgjedhjet e 30 qershorit. Tha nuk do ti lëshojmë zyrat, i lëshoj zyrat me çelësat me të gjitha me të tëra. Nuk do bëjmë këtë, nuk do bëjmë atë. Mbi trupin tim do kalojë ky, mbi trupin tim do kalojë ai”./Opinion.al
