Plot 1 milion Euro pasuri të patundshme, apartamente, garazhe e truall, u sekuestruan nga policia në Durrës në pronësi të një 57-vjeçari, i dënuar në Itali.
Ai është Mehmet Seferi me origjinë nga Dibra dhe prej disa vitesh banonte në zonën e Rrashbullit në Durrës së bashku me familjen. Sipas burimeve, mësohet se pasuritë e patundshme që u sekuestruan janë të lokalizuara brenda qytetit të Durrësit.
Mehmet Seferi kishte emigruar në Itali, ku dhe u arrestua dhe aktualisht vuan dënimin me 3.6 vite burgim.
Ai është dënuar për gjobëvënie të kryer në bashkëpunim. Policia e Durrësit njoftoi se është provuar që pasuria e 57-vjeçarit është krijuar nga aktiviteti ilegal në Itali.
Njoftimi i policisë
Durrës – Sekuestrohen 1 milion euro pasuri të paluajtshme, si dhe 30 milion lekë e 5.770 euro Seksioni Kundër Pastrimit të Parave në Drejtorinë Vendore të Policisë Durrës në bashkëpunim me Prokurorinë e Durrësit, ka vënë në sekuestro një shumë të konsiderueshme të hollash dhe pasuri të paluajtshme të shtetasit Xh.S., 57 vjeç, nga ky qytet.
Pas një hetimi dy vjeçar të zhvilluar me metoda speciale është arritur të dokumentohet se 57 vjeçari e ka përfituar këtë pasuri në bazë të aktivitetit kriminal të ushtruar në Itali. Ai është dënuar në Itali me 3 vjet e 6 muaj burg për veprën penale “Gjobëvenie e kryer në bashkëpunim”. Në përfundim të hetimeve u bë sekuestrimi i llogarive bankare me vlerë 30 milion lekë dhe 5.770 euro, si dhe 7 pasuri të paluajtshme si truall, banesa, garazh, apartamente me një vlerë monetare në total rreth 1 milion euro, të cilat dyshohet të jenë përfituar nga ushtrimi i aktivitetit të paligjshëm. Materialet hetimore u kaluan në Prokurorinë Pranë Gjykatës së Shkallës së Parë Durrës për veprime të mëtejshme./ Opinion.al E.Xh.
