Një 54 vjecar nga Lushnja ndërroi jetë sot pas problemeve me zemrën në ambientet e Spitalit ‘Nënë Tereza” në Tiranë, ndërsa familjarët e tij akuzojnë policinë si shkaktare të kësaj ngjarje. Mësohet se Fadil Hoxha ishte ndaluar nga policia pasi akuzohej se kishte marrë ullinj në tokën e dikujt tjetër, ndërsa ishte denoncuar nga ky i fundit.
Pas kallëzimit, Hoxha ishte shoqëruar në polici, në një kohë që ai vuante nga zemra dhe merrte 3 herë ilaçe në ditë. Sipas dëshmisë së familjarëve të tij, ndonëse ata i kishin kërkuar punonjësve të policisë që t’i fusnin në ambientet e paraburgimit ilaçet, kjo e fundit sipas tyre kishte refuzuar. Ndërkohë, një tjetër version të ngjarjes ka dhënë policia. Burime zyrtare bëjnë me dije se Hoxha i ka patur ilaçet me vete. Sipas bluve, 54-vjeçari ishte ndaluar dje, ndërsa sot kishte shfaqur probleme me shëndetin. Të njëjtat burime theksuan se policia kishte njoftuar familjarët, të cilët i kanë dërguar ilaçe të tjera shtesë.
“Hoxha u vizitua nga kardiologu më i mirë në Lushnje. Kardiologu na tha që ka kaluar parainfarkt. Më pas e dërguam në QSUT. Çdo lëvizje është e regjistruar në librin e policisë”, pohojnë burime pranë policisë së Lushnjës./ Balkanweb
