Kjo verë për 53 deputetët e rinj socialistë të dalë nga zgjedhjet e 11 Majit do të jetë intensive, pasi përpara se të futen në Kuvend, të sapozgjedhurit e Edi Ramës duhet të kalojnë së pari nga “bankat” e një kursi trajnimi.
Dhe për këtë ka menduar vetë Kryeministri i cili në takimin e dytë të fitores me kandidatët e mazhorancës në 26 Maj paralajmëroi nga Pallati i Brigadave hapjen e një sesioni të posaçëm të Akademisë Politike të Partisë Socialiste për të gjithë deputetët që hyjnë për herë të parë në Kuvend në shtator.
Shkolla verore do të nisë në 20 qershor dhe pjesë janë edhe 9 ministra aktualë, të cilët do t’i nënshtrohen trajnimeve për t’u njohur me praktikën legjislative, sjelljen në parlament, detyrat dhe të drejtat që u jep Kushtetuta për ta kryer më së miri detyrën e tyre.
Kursi i deputetëve do të zhvillohet çdo fundjavë në selinë rozë deri në fund të muajit Korrik.
Televizioni Klan ka mësuar se lektori i parë i rishtarëve të parlamentit do të jetë vetë Kryeministri Edi Rama.
Ata që do të ndajnë eksperiencën parlamentare me brezin e rinj do të jenë emra të njohur nga ajo që njihet si garda e vjetër e socialistëve, ku mes emrave mësohet se janë Fatmir Xhafaj, Niko Peleshi, Erion Braçe, si dhe politikanë që ndër vite kanë mbajtur pozicione drejtuese në Kuvendin e Shqipërisë dhe të grupit parlamentar të socialistëve.
Qëllimi i kësaj shkolle verore për rishtarët socialistë është që deputetët të kuptojnë rolin e tyre kushtetues dhe të mësojnë si ndërtohet marrëdhënia me elektoratin.
Një sesion tjetër i posaçëm do të jetë njohja e deputetëve të rinj edhe me procesin e integrimit evropian, si dhe përfaqësimi i Shqipërisë në arenën ndërkombëtare, leksione që do t’i japin ish-ministrja e Jashtme Olta Xhaçka, si dhe ministrja e Shtetit për Administratën Publike dhe Antikorrupsionin, Adea Pirdeni.
Tv Klan
