Ministri i Brendshëm, Taulant Balla ka reaguar lidhur me arrestimet e 5 personave të tjerë gjatë ditës së sotme në kuadër të operacioneve “Tempulli” dhe “Sundimi i Ligjit” në Kavajë dhe Tiranë.
Ai tha se operacionet vijojnë dhe se priten çdo ditë e më shumë rezultate.
“Garantimi i rendit dhe i sigurisë lidhet ngushtësisht me luftën kundër armëmbajtjes pa leje si një burim potencial i krimeve të rënda kundër personit. Dy operacionet kombëtare “Tempulli” dhe “Sundimi i ligjit” vijojnë të ndjekin këmba këmbës shpërndarësit e lëndëve narkotike, poseduesit e armëve pa leje, si dhe ndalimin e shtetasve në kërkim kombëtar e ndërkombëtar.
Në Kavajë janë vënë në pranga 4 shtetas dhe është sekuestruar lëndë narkotike kanabis, gati për shpërndarje.
Në Tiranë janë sekuestruar dy armë zjarri e municion luftarak, si dhe është vënë në pranga poseduesi i tyre.
Presim më shumë rezultate çdo ditë”, shkruan Balla në reagimin e tij./Opinion.al
