Belind Këlliçi , tashmë kryetar i Komisionit që do të drejtojë Kuvendin e 11 Dhjetorit të mbajtur nga ish-kryeministri Sali Berisha ka deklaruar se nga tabelat elektronike të verifikuara në “Air Albania”, kanë rezultuar 4934 delegatë të pranishëm.
Kështu sipas tij, Kuvendi është jo vetëm i ligjshëm, por ka edhe aftësi vendimmarrëse.
“Numri total i delegatëve të Kuvendit Kombëtar është 7646. Sekretariati më njofton se 4200 formularët e depozituar për thirrjen e Kuvendit janë firmëtarë dhe janë të pranishëm në Kuvend. Në zbatim të statutit deklaroj se ky Kuvend është i thirrur ligjërisht sipas statutit të PD-së,” tha Këlliçi.
“Në lidhje me kuorumin, sekretariati deklaron se numri i delegatëve pas verifikimit është 4934 delegatë. Numri minimal duhej të ishte 3824. Deklaroj se Kuvendi ka kuorumin e ligjshëm sipas statutit të PD dhe ka aftësi të plotë vendimmarrje nga ky çast. Nga ky moment Kuvendi ka nisur punimet zyrtarisht.” tha Këlliçi.
