Familjarët e shqiptarit nga Peshkopia që ndërroi jetë në një burg të Maqqedonisë së Veriut, akuzojnë autoritetet se nuk i kanë siguruar mjekim 47-vjeçarit.
Azbi Kaba, baba i tre fëmijëve ishte dënuar me 7 vite burg, pasi akuzohej për trafikim të lëndëve narkotike, ndërsa 5 muaj më parë ishte diagnostikuar me kancer.
Në fshatin Pilafe të Peshkopisë, BË siguron dëshminë e familjarëve të cilët akuzojnë edhe shtetin shqiptar se nuk bëri aq sa duhej për këtë çështje.
Nëna e viktimës shprehet se i biri nuk kishte qenë kurrë i sëmurë, ndërsa kohët e fundit ishte dobësuar shumë. Ajo thotë se atij iu mohua e drejta për t’u kuruar.
“Sëmundje nuk ka pasur. Sëmundjen t’ja gjejnë ata. As një aspirinë se kishte pirë. Punonte. Shihte punën e vetë. Ia çuan direkt atë dënimin, s’e nuk e nxorën në gjyq si të tjerët. Më thanë se 3 herë është bërë operim, por s’e di. E kam parë në burg, ishte tretur. Ishte 1 kuintal njeri dhe ishte bërë…Me shqiptarë të tjerë nuk jam takuar, isha takuar vetëm më djalin. Na gënjente avokatja ne, por djalit s’i kanë kapur kurrë gjë, as drogë. Vetëm disa numra telefoni, por ata ishin numra pune, mjet pune. Për 7 vite shpresat na u shkëputën. Nuk e nxorën nga burgu. U varrofshin për këmbe. Shteti duhet të bënte më shumë. Duhet të kishin bërë punë. Njeriu lufton sa të ketë jetë. U sëmur, ta çonin në spital ose ta sillnin te ne.”, tha nëna.
Familjarët tregojnë se lajmin e kishin mësuar përmes telefonit, ndërsa vjehrri i tij pohon që sasia e lëndës narkotike që i ishte kapur, ka qenë shumë e vogël.
“Ngjarjen e morëm vesh përmes telefonit. Kishte 7 vite burg. Ishte në burg për lëndë narkotike. As një gram nuk i kapën. Ka 3 fëmijë. Nuk vuante nga asnjë sëmundje. Ministri i Drejtësisë u mundua, kërkoi që të lirohej. Ambasada shqiptare tentoi, por s’e liruan.”, tha vjehrri i 47-vjeçarit./Opinion.al
