Rezultatet paraprake të zgjedhjeve të 11 Majit tregojnë një epersi të mandateve të Partisë Socialsite. Nga votat e numëruara në rang vendi, PS merr 82 mandate dhe ndërsa Partia Demokratike deri tani ka siguruar 52 mandate. Ndërsa tre ulëse në Kuvend pritet të ketë Partia Social-Demokrate, dhe nga 1 deputet Lëvizja Bashkë, Koalicioni Nisma Shqipëria Bëhet dhe Partia Mundësia.
Për sa i përket ndarjes në rang qarku, në Berat nga 7 mandate total, PS ka siguruar 5 deputetë, 2 nga lista e mbyllur dhe tre nga lista e hapur, ndërsa PD ka siguruar vetëm 2 deputetë nga lista e mbyllur.
Ndërsa në qarkun e Dibrës, PS ka siguruar 3 deputetë, 2 nga lista e mbyllur dhe 1 nga lista e hapur. Partia Demokratike vetëm 2 deputetë nga lista e mbyllur.
Qarku i Durrësit, një nga zonat zgjedhore që nxjerr 14 mandate në total, Partia Socialiste ka siguruar 8 mandate, 5 në listë të mbyllur dhe 3 nga lista e hapur. Ndërsa Partia Demokratike ka siguruar 6 deputetë, vetëm 1 nga lista e hapur.
Rezultat i thellë paraqitet në qarkun e Elbasanit, i cili në total ka 14 mandate. Nga votat e zgjedhësve, PS ka prodhuar 10 deputetë, 5 në listë të mbyllur dhe 5 në listë të hapur, ndërsa PD vetëm 4, duke mos plotësuar as vendet në listën e mbyllur.
Qarku i Fierit, i dytë pas Tiranës për numrin e lartë të mandateve, në Parlamentin e ri do të ketë 16 mandate deputetësh. Prej tyre, PS ka siguruar 12 mandate, 5 nga lista e sigurt dhe 7 nga lista e hapur. Ndërsa PD ka siguruar vetëm 4 deputetë, 1 më pak sesa ishte lista e mbyllur e kandidatëve.
Qarku i Gjirokastrës nga 4 mandate, deri tani PS ka siguruar 3 deputetë, 1 në listë të mbyllur dhe 2 nga lista e hapur. Ndërsa PD ka siguruar vetëm 1 deputet nga lista e mbyllur. Në qarkun e Korçës, i cili prodhon 10 deputetë, PS ka siguruar 6 mandate ,3 në listë të mbyllur dhe 3 në listë të hapur. Ndërsa PD ka nxjerrë 4 deputetë, 3 në listë të mbyllur dhe 1 në listë të hapur.
Në qarkun e Kukësit, i cili ka në total 3 deputetë, prej tyre PD ka siguruar 2 mandate, 1 në listë të mbyllur dhe 1 në listë të hapur. PS ka vetëm 1 deputet nga lista e e sigurt.
Qarku i Lezhës ka prodhuar 7 deputetë, prej tyre PD ka siguruar 4 mandate, 2 nga lista e sigurt dhe 2 nga lista e hapur. Ndërsa PS 3 deputetë, prej tyre vetëm 1 nga lista e hapur.
Partia Demokratike kryeson edhe në qarkun e Shkodrës. Nga 11 deputetë që nxjerr ky qark, PD ka siguruar 5 deputetë, 4 nga lista e sigurt dhe 1 nga ajo e hapur. Ndërsa PS ka siguruar vetëm 4 deputetët e listës së mbyllur. Dy deputetë në këtë qark i ka marrë PSD.
Qarku i Tiranës, më i madhi në vend që nxjerr edhe numrin më të lart të deputetëve me 37 mandatë në total, PS ka siguruar 19 deputetë, 12 nga lista e sigurt dhe 7 nga ajo e hapur. Ndërsa PD ka siguruar 14 mandate, prej tyre vetëm dy deputete janë nga lista e hapur. Në këtë qark kanë nxjerrë edhe deputetë nga Lëvizja Bashkë dhe Koalicioni Nisma Shqipëria Bëhet.
Nga zgjedhjet e 11 Majit, qarku i Vlorës ka nxjerrë 12 deputetë, prej tyre PS ka siguruar 8 deputetë, 4 nga lista e sigurt dhe 4 të tjerë nga lista e hapur. Ndërsa PD ka siguruar vetëm 4 ulëse në Kuvend nga lista e mbyllur. Tv Klan
