Varshava pritet të vendosë 40,000 trupa në kufirin me Bjellorusinë dhe Rusinë. Vendimi vjen pas shkeljes së hapësirës ajrore polake nga Moska. Ndërkohë sipas mediave vendase, kjo është përgjigja e Polonisë ndaj stërvitjeve të përbashkëta ushtarake ruso-bjelloruse “Zapad”, të cilat fillojnë në Bjellorusi më 12 shtator.
“Polonia është përgatitur për stërvitjet Zapad 2025 për disa muaj. Le të kujtojmë se kjo është një stërvitje offensive. Ushtria polake kreu stërvitje që përfshinin më shumë se 30,000 ushtarë polakë, si dhe ushtarë të NATO-s, për t’iu përgjigjur në mënyrë adekuate”, tha zëvendësministri i Mbrojtjes Cezary Tomczyk për Polsat News.
Ministri i Jashtëm polak Radoslaë Sikorski tha gjatë kësaj jave se Rusia dhe Bjellorusia do të kryejnë “skenarë shumë agresivë”.
Polonia mbylli kufirin me Bjellorusinë natën midis të enjtes dhe të premtes. Pas kësaj Kryeministri polak Donald Tusk njoftoi se Varshava do të bashkëpunojë ngushtë me Kievin për t’iu kundërvënë kërcënimit të dronëve rusë. Ai e bëri deklaratën për gazetarët, siç raportohet nga Ukrinform.
Në Francë, Ministria e Jashtme thirri Ambasadorin rus. Lëvizja e Parisit vjen pas tensioneve të krijuara me depërtimin e dronëve në Poloni dy ditë më parë. Lajmin e njoftoi ministri në detyrë i Punëve të Jashtme
“Do të thirret këtë mëngjes. Do t’i themi se nuk do të lejojmë të na frikësojnë,” deklaroi Jean-Noël Barrot për France Inter. Qoftë e qëllimshme apo jo, aksidentale apo jo, e gjithë kjo është shumë serioze. Është absolutisht e papranueshme dhe kjo i shtohet provokimeve të panumërta të Vladimir Putinit,” tha kreu i diplomacisë franceze.
Edhe Presidenti amerikan Donald Trump reagoi në lidhje me hyrjen e dronëve rusë në hapësirën ajrore të Polonisë.
“Mund të ketë qenë një gabim. Por nuk jam i kënaqur me ngjarjen apo me çdo gjë që ka lidhje me të”, tha Trump duke iu përgjigjur reporterëve.
