Investimet e huaja direkte vijojnë të qëndrojnë në nivele historike edhe për tremujorin e parë të këtij viti.
Të dhënat e Bankës së Shqipërisë flasin për një fluks investimesh të huaja të cilat arrijnë vlerën e 362 milionë eurove, me një rritje prej 2.3% me bazë vjetore.
Ashtu sikundër raportohet edhe nga INSTAT, aktiviteti i pasurive të paluajtshme listohet me kontributin më të madh të tërheqjes së investimeve të huaja direkte.
Sipas Bankës së Shqipërisë, ky zë regjistron 104 milionë euro investime.
Më pas vijnë investimet në aktivitetin financiar dhe të sigurimit me 75 milionë euro, si dhe industria nxjerrëse me 51 milionë euro.
Nga ana tjetër, forcimi i Lekut në kursin e këmbimit valutor ka rritur edhe vlerën e investimeve të huaja direkte në Shqipëri.
Sa i takon hartës prej nga vijnë investimet, lista kryesohet nga Turqia me rreth 50 milionë euro investime në Shqipëri, ndjekur nga Holanda, Italia e Gjermania, ndërsa për rreth 69 milionë euro investime nuk tregohet vendi i origjinës për arsye konfidencialiteti.
Tv Klan
