36 persona kanë humbur jetën gjatë përleshjeve në fundjavë në një burg në Honduras, ndërsa ushtria dhe policia po përpiqen të rimarrin kontrollin në vendin e “pushtuar” nga bandat kriminale.
18 persona u vranë dhe 16 të tjerë u plagosën të premten në burgun “El Porvenir”, 50 km larg kryeqytetit Tegucigalpa, ndërsa 18 të tjerë, të gjithë pjesëtarë të një bande u vranë të dielën. Gjatë sherrit masiv u përdorën armë zjarri, thika dhe hanxharë, tha autoritetet e burgut.
Ngjarja e rëndë ndodhi vetëm pak orë pasi Presidenti Juan Orlando Hernandez kishte urdhëruar ushtrinë dhe policinë që të merrte në kontroll 27 burgjet e vendit që janë të tejmbushura me rreth 21 mijë të burgosur. Autoritetet më vonë thanë se rreth 1200 efektivë të ushtrisë u vendosën në 18 burgjet me më shumë rrezik.
Më herët, gjatë këtij muaji u vranë edhe 14 pjesëtarë të bandës MS13, një prej më të rrezikshmeve në vend që vepron edhe në SHBA, por edhe Pedro Armas, drejtori i burgut më të madh në vend.
Ai ishte shkarkuar nga detyra pak orë para se të vritej, pasi mendohej se kishte qenë i pranishëm gjatë vrasjes së një bosi droge lokal, i cili gjatë rrëfimit të tij kishte përmendur emrin e vëllait të Presidentit, Juan Antonio Hernandez, duke bërë që ai të shpallej fajtor për trafik droge në gjyqin që iu zhvillua në Nju Jork, dhe në janar pret verdiktin që me shumë mundësi do të jetë me burgim të përjetshëm./ Opinion.al
