35 organizata dhe 734 qytetarë firmosën një peticion, të cilin ia dërguan Ministrisë së Ekonomisë, Kulturës dhe Inovacionit, ku i kërkohet që të ndërpriten menjëherë punimet në burgun e Spaçit. Ata shprehen se projekti është i “pakoordinuar dhe amatoresk”.
“Ky peticion, i hartuar në një gjendje të jashtëzakonshme gjendje në të cilën na vuri ndërhyrja e papritur, e pakoordinuar dhe amatoreske e Institutit Kombëtar për Mbrojtjen e Kulturës bëri që 35 organizata dhe 734 qytetarë ta firmosnin për vetëm 6 ditë. Qëllimi i tij është ndalimi i vazhdimit të punimeve dhe, për rrjedhojë, parandalimi i tjetërsimit të historisë”, thanë aktivistët në një deklaratë para MEKI-t.
Ata kundërshtojnë ndërhyrjen në kamp, për të cilën thonë se bie ndeshme planin e menaxhimit që vetë qeveria ka miratuar.
“Në këtë plan thuhet qartë se nuk do të ketë ndërhyrje që tjetërsojnë kujtesën, vlerat historike apo strukturën e burgut kamp të Spaçit. Gjithashtu, kjo ndërhyrje bie ndesh me Ligjin për Trashëgiminë Kulturore dhe Muzetë, si dhe me VKM-në shoqëruese nr. 1099: “Për kriteret dhe mënyrat e ndërhyrjes në pasuritë kulturore”, e cila përcakton qartë direktivat për ndërhyrjet restauruese – të cilat nuk kanë asnjë lidhje me ndërhyrjen që po kryhet aktualisht në këtë zonë’”, u tha në deklaratë.
Ndërkohë u paralajmërua se për rastin do të ketë përgjegjësi penale.
“Përmes kësaj komunikate duam t’i themi edhe Inspektoratit, ose inspektorit përgjegjës pranë Institutit Kombëtar të Trashëgimisë Kulturore, se do të procedohen penalisht për shpërdorim detyre nëse nuk merren masa për ndalimin zyrtar të punimeve dhe ndërprerjen e menjëhershme të këtij projekti. Në vend që të vepronin sipas ligjit siç e kanë për detyrë, si Ministria ashtu edhe Instituti zgjodhën të merren me aktivistët, ish-të burgosurit apo qytetarë të angazhuar në këtë kauzë. Por edhe kjo nuk zgjati shumë, sepse vetë ministri duket sikur filloi të tërhiqej dhe të pranonte se aty kishte ndodhur një gabim.
Por dikush duhet t’ia kujtojë ministrit se në këto raste “gabimi” duhet të shoqërohet me mbajtje përgjegjësie instuticionale që fillon me inspektorin që se ka bërë punën për të cilën paguhet nga taksapaguesit e deri te ministri që përveç ekonomisë i ka rënë fati i keq të merret dhe me kulturën. Ne jemi këtu, më të bindur, më të vendosur dhe më të zëshëm se ditën kur e nisëm këtë betejë. Spaçi është pasqyra në të cilën ne shohim të shkuarën, por edhe horizonti drejt të cilit mund të ndërtojmë të ardhmen”, u tha në deklaratë.
Kujtojmë se në lidhje me këtë çështje Komisioni për Edukimin dhe Mjetet e Informimit Publik do të zhvillojë një seancë dëgjimore me ministrin e Ekonomisë, Kulturës dhe Inovacionit, Blendi Gonxhja, drejtuesen e Institutit të Trashëgimisë Kulturore dhe me përfaqësuesit e shoqatave të të përndjekurve politikë.
