Fakte tronditëse mësohen rreth asksidentit tragjik të Sukthit. Autori i krimit, vrasjes në rrugë të tre vajzave të pafajshme ishte pikasur nga policia. Dashnor Deliallisi ecte në kahun e kundërt të lëvizjes në autostradë me shpejtësi të madhe.
Në një njoftim të fundit, policia ka vertetuar atë që tha më herët një specialist Rrugor për Opinion.al. Nuk kemi të bëjnë me një aksident, por me një person që ecte çmendurisht dhe nuk i bindej urdhërave të policisë për të ndaluar.
Njoftimi i plotë i policisë së Durrësit për aksidentin tragjik
Në datë 13.10.2016, në afërsi të karburant “Kastrati”, shërbimet e Rendit dhe të Qarkullimit Rrugor Durrës ishin në pikë kontrolli kur kanë konstatuar një mjet tip “Benz” duke ecur në krah të kundërt dhe me shpejtësi tej normave të lejuara.
Shërbimet e policisë i kanë bërë shenjë të ndalonte, por drejtuesi i mjetit ka shtuar shpejtësinë duke vënë në rrezik jetën e punonjësve të policisë.
Menjëherë efektivët e policisë në postobllok kanë njoftuar Sallën Operative dhe janë vënë në ndjekje , por mjeti është shkëputur duke përfituar në kohë pasi lëvizte në sens të kundërt dhe shërbimet e policisë nuk kanë lëvizur në sens të kundërt.
Këto shërbime kanë konstatuar pak minuta më vonë se po ky mjet ishte përfshirë në një aksident në autostradën Tiranë-Durrës, në Sukth, rreth orës 04: 15.
Për pasojë kanë humbur jetën në aksident drejtuesi i mjetit tip “Benz” Dashnor Deliallisi, 36 vjeç, banues në Durrës, i cili u përplas me mjetin tip “Benz” me targa AA 694 IL.
Gjithashtu humbën jetën Greta Sherifi 23 vjeçe, banuese në Sarandë, pronare e makinës, Izabela Balla, 33 vjeçe, si edhe Elona Kaçibaros, 34 vjeçe, banuese në Tiranë.
Policia vijon hetimet për zbardhjen e shkaqeve të aksidentit.
*Në foto: Dashnor Deliallisi dhe makina e tij pas aksidentit
