Instituti i Shëndetit Publik bën me dije se të paktën 30 persona janë prekur nga fruthi në vendin tonë përgjatë kësaj periudhë. Sipas ISHP-së, rastet e konfirmuara i përkasin kryesisht grupmoshës nën 2 vjeç. Në këto rrethana ky institucion rekomandon vaksinimin, veçanërisht për fëmijët.
“Instituti i Shëndetit Publik ju bën thirrje të gjithë prindërve të vaksinojnë fëmijët e tyre sipas kalendarit kombëtar të vaksinimit dhe udhëzimeve të ISHP-së për grupet që janë më të rrezikuara.
Jo vetëm fëmijët, por edhe të rriturit që nuk janë vaksinuar ndaj fruthit apo nuk kanë marrë dy doza të vaksinës, duhet të vaksinohen. Vaksinimi ndaj fruthit është mbrojtja më e mirë për parandaluar fruthin dhe komplikacionet që vijnë prej tij. Për shkak se kjo periudhë e vitit sjell rritje të numrit të rasteve të infeksioneve respiratore dhe gripit, bëhet akoma më i rëndësishëm vaksinimi, për të parandaluar përhapjen e fruthit.”, thuhet në njoftimin e ISHP.
Nga ana tjetër ISHP sugjeron një sërë masash për tu mbrojtur nga sëmundja e cila shënon komplikacione të rënda. Disa nga masat janë si më poshtë janë:
– Izolimi në pavione të caktuara në spitale dhe vetëizolimi për rastet ambulatore.
– Masa standarte të kontrollit të infeksionit dhe ato të transmetimit nëpërmjet ajrit.
– Përdorim i mjeteve të mbrojtjes personale, si maskave, etj nga personeli dhe pacientët kur shkojnë në ekzaminim.
– Gjurmim dhe vaksinim brenda 72 orëve i kontakteve.
– Vaksinim i disa grupeve të rrezikuara.
Kujtojmë se dy ditë më parë fruthi ka shënuar viktimën e parë për këtë vit. Një foshnje 4 muajshe ka ndërruar jetë në Shërbimin e Pediatrisë, në Qendrën Spitalore Universitare Nëne Tereza./E.M
