Gjatë procesit zgjedhor të ditës së dielës, sipas referimeve që janë bërë nga prokuroria pranë gjykatave rezulton se janë 5 kallëzime penale.
Kështu kryetarja e bashkisë Shkodër, Voltana Ademi ka bërë kallëzim ndaj policisë lokale. Po ashtu nga ana tjetër policia ka bërë kallëzime (5) për zonjën Ademi si dhe një shtetas tjetër.
Në Kurbin, Kandidati i Bindjes Demokratik Edmond Piroli ka denoncuar se anëtarët e Komisionit të dy Qendrave të Votimit në fshatin Fushë-Kuqe, kanë futur në kutitë e votimit fletë votimi dhe kanë nënshkruar në emër të votuesve, pa qenë prezent votuesit.
Konkretisht, sipas kallëzuesit, në dy qendrat e votimit, në ambientin privat “Lokal i shtetasit Vasil Ulaj”, në Fushë-Kuqe, pretendohet të kenë votuar 6 shtetas, ndërkohë që në kutitë e votimit janë futur dhe gjenden rreth 60 fletë votimi në njërën kuti dhe rreth 120 fletë votimi në kutinë tjetër.
Në Fier dy persona, Alfred Davidhi e Klevi Berzhezha janë kallëzuar për pengim të zgjedhësve, duke iu bërë presion atyre. Në Korçë po verifikohen akuzat e PD-së së këtij qyteti, në lidhje me një video ku tregohen pa rregullsi. Nga ana tjetër në Elbasan një shtetas ka votuar më shumë se një herë. / Opinion.al
