Të marrësh atë që të takon, duket një gjë e pamundur në Shqipëri. Në emisioni investigativ “Fiks Fare” u tregua rasti i një doktori neurolog që ka marrë 30 mijë lekë ryshfet për t’i dhënë “Kemp”-in një të paralizuari. Në pamjet e transmetuara, u pa se si doktori neurolog, Çaush Zogu mori ryshfetin dhe i premtoi djalit të të paralizuarit se do t’i plotësonte dokumentet.
I moshuari prej 6 muajsh është në gjendje të rëndë. Ai komunikon me gjeste me familjarët. Por doktori neurolog i Gramshit, Çaush Zogu e pranon se pacienti është në gjendje të rëndë, e duke përfituar nga kjo situatë, i kërkon djalit të tij 30 mijë lekë vetëm për të shpejtuar dokumentet në Tiranë dhe Elbasan.
“Unë kam babanë të paralizuar, ka 6 muaj. E kam sjell në Spitalin e Gramshit, të gjitha ilaçet i kam blerë vet. Nuk kam mundësi që t’i blej. Më kanë thënë që e ka goditje nga stresi. I ka kapur pjesën e djathtë të trurit. Madje komunikon me shenja, nuk reagon fare. E marrim me barrelë që e çojmë për vizitë”, thotë qytetari.
Ai shkon në Poliklinikë dhe bisedon me doktorin për shumën e lekëve. Doktori i thotë se me 30 mijë lekë mbaron puna dhe se babai i tij e fiton ‘Kemp’-in. Qytetari i paguan 30 mijë lekët dhe, pas dhënies së lekëve, qytetari duhet të shkojë një ditë tjetër që të marrë edhe konfirmimin nëse është pranuar apo jo ‘Kemp’-i. G.F/Opinion.al
