Të paktën dhjetë persona janë vrarë në një sulm të armatosur në një shkollë në qytetin jugor austriak të Gracit. Shtatë nxënës dhe të paktën një i rritur, si dhe autori i dyshuari, janë midis të vdekurve, konfirmuan autoritetet, duke e quajtur atë një tragjedi të papërshkrueshme.
Masakra e fundit nxjerr në pah nivelet e pronësisë së armëve në Austri, e cila ka një nga popullatat civile më të armatosura në Evropë, me rreth 30 armë zjarri për 100 persona, sipas Sondazhit të Armëve të Vogla. Kjo e bën atë vendin e 14-të më të armatosur në botë.
Ligjet për armët në Austri janë përgjithësisht më liberale sesa në shumë pjesë të Evropës.
Zotërimi i pushkëve dhe armëve të gjuetisë lejohet për çdo qytetar evropian mbi 18 vjeç, megjithëse ata duhet t’i regjistrojnë armët te autoritetet brenda gjashtë javësh dhe i nënshtrohen një periudhe pritjeje tre-ditore.
Pistoletat, revolverët dhe armët e zjarrit gjysmëautomatike mund të blihen vetëm nga persona mbi 21 vjeç që kanë leje për armë zjarri.
Në përgjithësi, kushdo që dëshiron të blejë një armë duhet të japë një arsye për blerjen e saj, e cila mund të jetë për të shtëna ose vetëmbrojtje. Një vlerësim psikologjik mund të kërkohet, por nuk është i detyrueshëm.
