Ndodhemi në lagjen Zguraj të Kavajës me denoncuesen Danjela Kola Laçi, e cila është trashëgimtarja e një prone e blerë që në vitin ’54 nga gjyshi i saj. Nga gjyshi, prona ka kaluar në 6 trashëgimtarët e tij dhe babai i saj nuk e ka regjistruar për neglizhencë.
Sot Danjela kërkon zgjidhjen e problemit dhe regjistrimin e pronës. Ajo thotë se për tre vjet rresht është përpjekur ta bëjë këtë me ligjin e vitit 2020, por nuk ia ka dalë.
Në Kadastrën e Kavajës na thonë se aty regjistrohen vetëm pronat-shtet. Ato private i kanë kaluar Tiranës.
Qytetarja: Dua të regjistroj pronën!
Specialistja: Kadastra, që është këtu tek zyra, është për pronat e shtetit. Pronat shteti: kopshte, shkolla, çerdhe, rrugë, trotuare. Vetëm për pronat, që janë me VKM në pronësi të Bashkisë, ndërsa për pronat private…
Qytetarja: Prona private, që nuk është regjistruar. Nuk del e regjistruar prona jonë.
Specialistja: Po pra, nuk ka lidhje fare. Nuk e kemi as në sistem, as…
Qytetarja: Po ku duhet që ta gjej?
Specialistja: Në Hipotekë!
Qytetarja: Hipoteka është në Tiranë?
Specialistja: Po!
Qytetarja: Këtu nuk ka asnjë zyrë, asnjë gjë?
Specialistja: Ka qenë këtu. Ka ikur në Tiranë.
Ne folëm me Dorian Muratin, i cili na tha, se prona do të regjistrohet.
Gazetarja: Jam Odeta, jam një gazetare nga emisioni “Stop”. Po të marr sot sepse dua një bashkëpunimin tuaj lidhur me regjistrimin e një prone me ligjin 2020.
Dorian Murati: Patjetër! Po! Me patjetër, që po! Mund të paraqitet qytetarja, pasi unë jam drejtor i ri në detyrë. Nëqoftëse je në dijeni, kam vetëm 5 ditë, që kam filluar. Edhe unë u konsultova dje, për çështjen e kësaj zonjës, që sapo më thatë tani. Thërrita të gjithë juristët në mbledhje, dhe më thanë, se është diçka e zgjidhshme, por është lënë në neglizhencë vetë nga banorët.
Gazetarja: Dakord, unë nesër po të sjell qytetaren.
Dorian Murati: Kur të detë. Patjetër Odetë, patjetër!
Gazetarja: Jam me këta qytetarët dhe po rri këtu jashtë. Thjesht domethënë të të vijnë që t’i lesh në dispozicion një specialist.
Dorian Murati: Patjetër! Patjetër, që po! I kam vënë që dje në dijeni. I kam nxjerrë të gjithë atë praktikën, gjërat, të gjitha. Normalisht, që është në dijeni.
E në fakt kështu ndodhi. Bashkë me zonjën ne shkojmë në zyrat e Kadastrës në Rinas, ku mori zgjidhje problemi i Danjela Kola Laçi.
