Tre persona kanë vdekur dhe katër konsiderohen të zhdukur si pasojë e një shpërthimi të ndodhur në një hidrocentral në veri të Italisë.
Shpërthimi, theksojnë mediat italiane ka ndodhur në ditën kur në ambientet e hidrocentralit po kryheshin teste.
Para shpërthimit është dëgjuar një zhurmë e çuditshme e cila ka detyruar punëtorët të largohen nga ambientet e hidrocentralit. Ekipet e shpëtimit ndodhen në vendngjarje, por sipas kryebashkiakut të Bolonjës situata nuk duket e mirë.
“Ekipet e shpëtimit po bëjnë një punë të mirë. Fatkeqësisht kushtet për rikuperim nuk janë të mira. Janë shumë të vështira -thellësia e këtij shpërthimi është shumë e thellë, ekspertët flasin për gati 70 metra thellësi. Ka një shembje strukturore. Zjarri për momentin është shuar. Po ndihmojnë edhe zhytësit sepse po flasim për 70 metra thellësi poshtë liqenit,” deklaroi Matteo Lepore.
“Aktualisht kemi gjetur tre trupa dhe katër rezultojnë të zhdukur. Ky është momenti i kërkimit. Më pas do të jetë koha për të kuptuar se çfarë ka ndodhur. Tani për tani angazhimi është maksimal. Zjarrfikësit, policia dhe të gjithë të tjerët janë të fokusuar tek puna. Të gjithë po përpiqemi të sigurojmë objektin dhe mbi të gjitha të kërkojmë të zhdukurit. Më pas do të përpiqemi me kohë dhe mjetet e duhura të kuptojmë se çfarë ka ndodhur,” deklaroi Francesco Notaro, shefi rajonal i Zjarrfikësve.
Autoritetet konfirmuan se zjarri kishte shpërthyer në një nga transformatorët e hidrocentralit afër Bolonjës. Shpërthimi ndodhi në digën e liqenit Suviana, një nga tre liqenet artificiale që ushqejnë hidrocentralin.
Kompania Enel nuk ka komentuar lidhur me shkakun por ekspertë të tjerë flasin për një defekt në turbinën e Hidrocentralit.
Vdekjet pritet të nxisin edhe më shumë shqetësimet e sindikatave për sigurinë në vendin e punës në Itali. Dy nga sindikatat më të mëdha në Itali kishin planifikuar qe më herët të mbanin një grevë katër-orëshe mbarëkombëtare për të protestuar për këtë çështje.
