Në listën e kriminelëve më të rrezikshëm të dënuar gjatë këtij viti në Londër janë edhe tre shqiptarë.
Suad Sufaj u arrestua teksa po udhëtonte në rrugën “Bowes” në Enfild. Policia i gjeti atij në makinë 1 kilogram kokainë me vlerë 100 mijë paund. Pas një kontrolli në shtëpinë e tij u gjetën edhe 8.5 kilogramë të tjera me vlerë rreth 800 mijë paund.
Sufaj, 26 vjeç, u dënua me 12 vjet heqje lirie në prill të këtij viti dhe pritet të ekstradohet në Shqipëri.
Një tjetër shqiptar në listë është Klevis Drazhi, 20 vjeç. Ai u ndalua në Moorgate më 19 janar pasi policia vuri re se po hynte me makinë në korsinë e biçikletave. Fillimisht oficerët i kërkuan atij lejen e automjetit dhe dokumentet e sigurimit. Drazhi dorëzoi një leje të rreme shqiptare, por policia vuri re në këtë moment një diçka të çuditshme në veshin e tij. Aty ishte fshehur një pako e vogël e bardhë.
Nga kontrolli rezultoi se ajo përmbante kokainë. Në makinë policia zbuloi edhe 11 pako të tjera të cilat kapnin vlerën e 1 mijë e 300 paundve.
Drazhi pohoi më vonë se ishte detyruar të furnizonte me drogë konsumatorët nga një anëtar i mafies shqiptare dhe pranoi se kishte hyrë ilegalisht në Mbretërinë e Bashkuar në pjesën e pasme të një kamioni.
20 vjeçari fillimisht u dënua me 11 muaj burg në gjykatën e Londrës, por Apeli e rriti dënimin e tij me 30 muaj më 16 prill.
Personi i tretë në listën e kriminelëve është padyshim më i rrezikshmi. Bëhet fjalë për Mane Drizën i cili akuzohet për disa vrasje në shtete të ndryshme.
Më 3 prill, gjykata në Bailey Old dha një dënim të përjetshëm me detyrim që të vuante minimumi 20 vjet burg.
Driza është dënuar për vrasjen e shokut të dhomës Stefan Bledar Mona pasi ky i fundit i kishte marrë unazën e të fejuarës dhe ja kishte dhënë gruas së vet. 41-vjeçari Driza goditi me thikë dhe mjete të forta më shumë se 120 herë. Ngjarja ka ndodhur në qershor 1999.
Gjykata u informua se Driza ishte shpallur fajtor për katër tentativa vrasjeje në Shqipëri dhe Itali.
Driza ishte ekstraduar nga Italia ku ishte në burg për një vrasje të dyfishtë dhe një vrasje të mbetur në tentativë. Ai kishte vrarë më parë dy persona të tjerë në vendin e tij të lindjes në Shqipëri.
Në vitin 2001 Driza u dënua në mungesë në Shqipëri për “vrasje me paramendim në bashkëpunim të qytetarëve”, së bashku me babanë e tij.
Në qershor 2002, ai u dënua në Siçili për komplotin për të vrarë Artan Maskaj dhe Albert Blushaj, dhe për vrasjen në tentativë të Lefter Maskaj.
Ai është në Itali për të përfunduar dënimin, dhe do të qëndrojë në burg atje deri në vitin 2026.
Më pas do të kthehet në Mbretërinë e Bashkuar për të vuajtur dënimin 20-vjeçar për vrasjen e pestë. /Opinion.al
