SICILI– Policia e Katanias shpartalloi një bandë italo – shqiptare të trafikut ndërkombëtar të marijuanës, pas një operacioni të gjerë të antidrogës. Në pranga përfunduan 15 persona, 9 prej të cilëve shqiptarë. Hetimet çuan në sekuestrimin e 3 500 kg drogë, në një vlerë prej 70 milionë eurosh.
Ngarkesa e marijuanës që importohej nga Shqipëria kishte si destinacion dy organizata kriminale të Katanias; “Grupin e Stacionit” dhe klanin e drejtuar nga njerëzit e Paolo di Mauros, pjësëtar i familjes mafioze Pillera, i cili ndërroi jetë në prill të vitit 2014.
Shqiptarët e arrestuar janë: Oresti Mufali, 33 – vjeç, Albert Shqau, 31 – vjeç, Erion Muçaj, 34 – vjeç, Emir Baja, 46 – vjeç, Jodian Shametaj, 25 – vjeç, Emiliano Shametaj, 28 – vjeç, Gentian Hoxhaj, 35 – vjeç, Fatjon Hoxhaj, 28 – vjeç dhe Erson Zhuka, 31 – vjeç.
Operacioni i koduar “Odisea” nisi në vitin 2012 edhe pati pikënisjen nga aktiviteti i mëparshëm i grupit të ashtuquajtur “Grupi i Stacionit” dhe hetimeve që përfunduan në 2013, me arrestimin e 24 personave të akuzuar për veprimtari mafioze, rrëmbime, trafik armësh dhe drogë etj.
Tre prej të ndaluarve janë lënë në arrest shtëpie. Mediat italiane theksojnë se trafiku i marijuanës mbetet një nga burimet kryesore të financimit të mafias lokale.
