Një sherr mes adoleshentësh përfundoi në tragjedi në Pogradec. 18-vjeçari Fabio Hila është qëlluar për vdekje nga bashkëmoshatari, 18 vjecari Fabian Muçllari. Ngjarja ka ndodhur në rrugën “Rinia” në qendër të qytetit.
Fabio Hila ka mbetur fillimisht i plagosur nga plumbat, por rrugës për në spital ka ndërruar jetë. Autori është larguar nga vendngjarja, por disa minuta më pas është arrestuar nga policia, ndërsa është sekuestruar edhe arma e krimit. “Për motive të dobëta”, thotë policia teksa përshkruan shkaqet, por ende nuk dihet egzaktësisht se cilat janë ato.
Njoftimi i policisë
Policia në kohë rekord kap autorin e vrasjes së ndodhur në Pogradec.
Në datë 13.09.2016, në Sallën Operative të Komisariatit të Policisë Pogradec ka ardhur një telefonatë se te rruga “Rinia” janë dëgjuar të shtëna me armë zjarri.
Menjëherë janë shkuar shërbimet e Policisë, të cilat kanë konstatuar se pas një konflikti për motive të dobëta, në një lokal në rrugën “Rinia” shtetasi F.M, rreth 18 vjeç, ka qëlluar me automatik shtetasin F.H, rreth 18 vjeç, i cili si pasojë e plagëve të marra, ka ndërruar jetë gjatë rrugës për në Spitalin e Pogradecit.
Autori i dyshuar i ngjarjes, është larguar nga vendngjarja, por si rezultat i reagimit të shpejtë të shërbimeve të policisë është kapur dhe shoqëruar në ambjentet e Komisariatit së bashku me armën e krimit.
Policia në vendngjarje po punon për zbardhjen e rrethanave të ngjarjes.
*Në foto (në të djathtë) viktima, Fabio Hila
