Në 28 janarin e parë pa shkrimtarin e madh Ismail Jadare, Presidenti i Republikës, Bajram Begaj ka reaguar me një mesazh vlerësimi për gjeniun e letrave shqiptare.
Telsa kujton përmes një postimi në rrjete sociale ditëlindjen e Kadares, ai thotë se vepra e shkrimtarit është një dëshmi për lashtësinë e shqiptarëve dhe identitetin evropian.
Edhe pse Kadare u nda nga jeta vitin e kaluar, Begaj thotë se ai do të jetojë për t’i treguar botës mbi Shqipërinë dhe shqiptarët, dramën historike, krenarinë dhe vitalitetin e kombit tonë.
“Sot, në datëlindjen e parë të Ismail Kadaresë pas ndarjes së tij nga jeta, ne ndihemi krenarë që gjeniu shqiptar i letrave ka zënë një vend të nderuar në panteonin e letërsisë dhe kulturës botërore.
Me prozën dhe poezinë e vet, ai i prezantoi botës autenticitetin dhe lashtësinë e ekzistencës sonë kombëtare.
Kadare dëshmoi në çdo faqe të veprave të tij forcën titanike, sakrificat dhe përkushtimin e popullit tonë për të qenë pjesë e kulturës evropiane dhe botës progresiste.
Për aq kohë sa lexuesit në mbarë botën do të vijojnë të lexojnë librat e tij, Kadare do të jetojë për t’i treguar botës mbi Shqipërinë dhe shqiptarët, dramën historike, krenarinë dhe vitalitetin e kombit tonë”, shkruan Begaj.
