Komisioni Qendror i Zgjedhjeve ka kërkuar fonde për të realizuar votimin dhe identifikimin elektronik në zgjedhjet e 25 prillit.
Mësohet se teknologjia në zgjedhjet e 25 prillit do të kushtojë 3 360 938 682, ndërsa 2 112 304 484 për pajisjet që do të bëjnë identifikimin biometrik të zgjedhësve dhe do të vendosen në të gjithë qendrat e votimit në mbarë vendin dhe 1 248 634 198 lekë për pajisjet e votimit dhe numërimit që do të testohen në jo më shumë se 20% të këtyre qendrave.
Komisioni Qendror i Zgjedhjeve nxori çmimet e referencës nga ofertat që kompanitë që veprojnë në këtë sektor i dërguan. Për votimin dhe numërimin elektronik u morën për bazë çmimet e 3 kompanive të huaja, mes të cilave do të përzgjidhet dhe fituesi. Ndërsa për identifikimin, ofertat erdhën nga 7 kompani, mes ndër to dhe vendase.
Ndërkohë, në shkresën dërguar kuvendit dhe qeverisë, Komisioneri Shtetëror i Zgjedhjeve, Ilirjan Celibashi, kërkon vënien në dispozicion të parave, për aq kohë sa afati limit për zbatimin e projektit të identifikimit është jo më vonë se 145 ditë larg zgjedhjeve.
