Kosova përkujton këtë të dielë 45 martirët e Masakrës së Reçakut. 24 vite më parë, më 15 janar të vitit 1999, pak banorë që nuk ishin larguar nga fshati Reçak i Komunë së Shtimes u zgjuan herët në mëngjes nga krismat e armëve që ishin bërë të zakonshme në atë periudhë të luftës. Atë ditë në këtë fshat, rreth 30 kilometra larg Prishtinës, forcat policore dhe ushtarake serbe vranë 45 civilë shqiptarë. Në mesin e tyre kishte burra, gra, pleq e fëmijë.
Kjo ngjarje trokiti në ndërgjegjen e bashkësisë ndërkombëtare duke e pasqyruar mizorinë e pushtetit ushtarako-policor serb. Ambasadori i misionit të OSBE-së, William Walker, asokohe pa me sytë e tij një nga ngjarjet më makabre të kryer nga regjimi i Sllobodan Millosheviçit. Ai pati deklaruar se nuk ka fjalë ta përshkruante këtë akt.
“Fatkeqësisht nuk kam fjalë për të përshkruar indinjatën time personale ose atë të të gjithë atyre që ishin me mua në vendin e asaj që mund të quhet vetëm si një mizori e papërshkrueshme”, deklaronte ai.
Për të nderuar martirët, presidentja Vjosa Osmani, kryeministri Albin Kurti dhe kryeparlamentari Glauk Konjufca, do të bëjnë sot homazhe tek Memoriali Përkujtimor.
Ndërkohë nga ora 11:00, krerët e shtetit do të marrin pjesë në ceremoninë përkujtimore, në Shtëpinë e Kulturës në Shtime. Vendosja e kurorës së përbashkët në memorial me prezencë të togut ceremonial të Forcës së Sigurisë së Kosovës dhe nderimet te varrezat në memorial janë po ashtu në axhendë./Opinion.al
