Në kohën që Rusia po përballet me një valë të parecedentë dëbimesh të diplomatëve të saj nga 23 shtete, si reagim për helmimin e ish-agjentit të dyfishtë rus, Sergei Skripal dhe vajzës së tij në Britaninë e Madhe, Putin duket se ka gjetur “ngushëllim” tek Presidenti i Turqisë, një prej vendeve më të fuqishme të NATO-s.
Agjencia turke e lajmeve Anadolu Agency (AA) raportoi të martën se Recep Tayyip Erdogan kishte zhvilluar një bisedë telefonike me Presidentin rus, Vladimir Putin. Sipas informacioneve të Kabinetit të presidentit turk, Erdoğan fillimisht i shprehu ngushëllimet me rastin e zjarrit në Kemerov.
Por, ndërkohë që marrëdhëniet e Rusisë me vendet perëndimore kanë hyrë në një krizë të paprecedentë, Erdgoan dhe Putin “konfirmuan përkushtimin e zhvillimit të marrëdhënieve bilaterale në të gjitha fushat”.
Ata biseduan edhe për samitin trilateral për krizën siriane, i cili do të mbahet më 4 prill në Ankara, me pjesëmarrjen e Turqisë, Rusisë dhe Iranit.
23 vende anëtare dhe partnere të NATO-s, përfshirë SHBA-të, Gjermaninë, Britaninë, Francën dhe Shqipërinë, kanë urdhëruar largimin nga vendet e tyre të 137 diplomatëve rusë me 26 Mars.
Rusia tha se do të përgjigjej ashpër ndaj kësaj lëvizjeje të koordinuar dhe fajësoi SHBA-të për presion ndaj vendeve të NATO-s për dëbimin e zyrtarëve rusë.
Zyrtarisht, Shqipëria dëbimin e dy diplomatëve e argumentoi me faktin se “veprimtaria e tyre nuk përputhet me statusin e tyre diplomatik”./tvklan.al
