Sekretari i Përgjithshëm i Partisë Socialiste Damian Gjiknuri dhe deputeti Erion Braçe me anë të postimeve në rrjetet sociale kanë kujtuar protestën e 12 viteve, kur më 21 janar të vitit 2011 mbetën të vrarë 4 protestues në bulevardin “Dëshmorët e Kombit”.
Gjiknuri ka thënë se nuk ka më kohë për të humbur dhe se drejtësia duhet të zbardhë plotësisht ngjarjen duke vënë para përgjegjësisë ligjore urdhëruesit e vrasjeve.
“Në dritën e fakteve të reja të bëra publike në media, 12 vjetori i vrasjes së katër qytetarëve të pafajshëm Hekuran Deda, Ziver Veizi, Faik Myrtaj dhe Aleks Nika është një këmbanë që bie për organet e drejtësisë. Nuk ka më kohë për të humbur! Organet ligjzbatuese duhet të zbardhin plotësisht dhe të vënë para përgjegjësisë ligjore sa më shpejt jo vetëm ekzekutorët por edhe urdhëruesit e këtyre vrasjeve.
Çdo ditë e humbur pa zbuluar e ndëshkuar autorët e urdhëruesit është një barrë e rëndë në kurrizin e atyre organeve të drejtësisë që për mision kanë dhënien fund të pandëshkueshmërisë!”-shkruan Gjiknuri.
Ndërkohë deputeti socialist Erion Braçe ka vendosur ta shoqërojë postimin e tij me anë të një videoje që përshkruan si ka ndodhur ngjarja e 21 janarit e vitit 2011 me shumë detaje. Ai e quan atë ditë si ditën më të keqe të jetës së tij.
Braçe flet për mbajtjen e politikës jashtë çështjes duke thënë se duhet vënëdrejtësi më çdo kusht.
“E di qe sistemet kane ndryshuar, janë ndare për te mbajtur politiken larg, duhet te jete kështu por po funksionon kështu për padrejtësi, imunitet te paligjshëm e status te paprekshmërisë për ata qe kane kryer pushkatimet. Duhet bere drejtësi me çdo çmim; Ne rrugën e ligjit e duke kërkuar provat deri ne fund, çdo dite, pa u ndalur! Asgjë, asnjë krim, asnjë vrasje nuk mund te fshihet gjithmonë, për gjithë jetën! Dje, dikush foli dhe nxori ne drite urdhrat; do flasin edhe te tjerë; Por duhet te kenë bindje qe do behet drejtësi, kjo i bën te flasin! Provat e reja vlejnë për drejtësinë! Kur ha e pi me prokurore, argëtohesh duke pare edhe futboll me ta, tamam me ata qe duhet te hetojnë e jo te bëjnë sehir, duhet qepur goja! Ne respekt të të pushkatuarve! Për te lënë drejtësinë te bej drejtësi, me prova te reja”, shkruan Braçe./Opinion.al
