Kreu i Prokurorisë së Posaçme, Altin Dumani, i është përgjigjur me një letër familjarëve të viktimave të “21 janarit”, të cilët disa ditë më parë depozituan një kallëzim të ri në SPAK, ndaj ish-kryeministrit Sali Berisha, ish-ministrit të Brendshëm të asaj kohe, Lulzim Basha dhe ish-kreut të Gardës, Ndrea Prendi. Familjarët kërkuan që çështja të merret në hetim nga SPAK.
Në letër Dumani, argumenton arsyet pse dosja i përket për hetime Prokurorisë së Tiranës.
Sipas SPAK, nga hetimet e kryera deri më tani nga Prokuroria e Tiranës, nuk ka asnjë element që sugjeron përfshirjen e subjekteve të përmendura në kallëzim për këtë ngjarje. Më tej, Dumani sqaron se është në pritje se çfarë do të dalë nga hetimet e Prokurorisë së Tiranës dhe në rast se nga hetimet do të konstatohet ekzistenca e ndonjë vepre penale apo subjekt në kompetencë hetimi, atëherë dosja do të merret në dorë nga vetë SPAK.
“Për këtë arsye, referuar nenit 75/a, 76 dhe 28 te K.Pr.Penale ju përcjellim për kompetencë lëndore materialin kallëzues me nr. K.137 prot., date 16.02.2023, me qëllim vlerësimi nga ana juaj. Nëse në vijim të verifikimeve apo hetimeve, do të konstatohet ekzistenca e ndonjë vepre penale apo subjekt në kompetencë hetimi sipas nenit 75/a të Kodit të Procedurës Penale, atëherë aktet e procedimit penal të dërgohen për kompetencë lëndore në Prokurorinë e Posaçme Kundër Korrupsionit dhe Krimit të Organizuar, referuar dhe nenit 28 të Kodit të Procedurës Penale”, thuhet në përfundim të letrës së Altin Dumanit.
