26-vjetori i rrëzimit të bustit të dikatorit Enver Hoxha i gjen gjen dekomratët në çadër. Ata protestojnë sot për zgjedhje të lira dhe të ndershme dhe në këtë kontekst të duket se asgjë s’ka lëvizur nga 26 vite më parë kur u rrëzua busti i diktatorit në sheshin kryesor të Tiranës.
Në përkujtim të kësaj date të shënuar për pluralizmin shqiptar në çadrën ku po zhvillohet protesta e opozitës morën pjesë ish-dhjetoristë.
Ish-drejtori i RD-së, Preç Zogaj kujton se si 26 vite më parë, rinia vrau frikën për të kërkuar lirinë e saj.
“E nisën studentët e Kamzës. E vazhduan ata të Universitetit të Tiranës. E kulmuan qytetarët e Tiranës më 20 shkurt ’91 ne 14:07. E përfundoi po atë ditë e gjithë Shqipëria, Korça, Fieri, Shkodra. Shqipëria u ngrys pa Enver Hoxhën.”
Për Preç Zogajn, mesazhi i lëvizjes së 20 shkurtit 1991 është ende i qartë sot.
Demokracia smund të shartohet me diktaturën – tha Zogaj – Ndaj sot Partia Demokratike bashkoi njerëzit për të rrëzuar monumentin e zgjedhjeve të vjedhura e të prishura.
Përmes risjelljes së shprehjes së shkrimtarit Viktor Hygo i cili thotë se “ska fuqi më të madhe sesa një kauzë koha e së cilës ka ardhur”, Preç Zogaj u shpreh se stilimi i kësaj lëvizje është një: fitorja.
Ndërsa për Bislim Ahmetajn, shqiptarët 26 vite më parë bënë të mundur që ëndrra të bëhej realitet.
Më parë thirrja ka qënë: e duam Shqipërinë si gjithë Europa – tha Ahmetaj, duke shtuar se sot, qeveria e ka kthyer në: duam që gjithë shqiptarët të ikin nga vendi i tyre në Europë.
Prandaj duhet të ngrihemi si në vitin ’91 për të rrëzuar këtë demokraturë – tha Ahmetaj.
Dje një nga studentët e qëndresës kundër diktaturës komuniste, sot pedagog, Ilir Kaduku tha se shoqëria përbëhet nga qëndrestarë idealistë.
Duke risjellë një shprehje të Winston Churchill, Kaduku thirrjen ia drejtoi popullit: Një popull që harron, vdes. Ne nuk duhet të harrojmë sakrificat e intelektualëve dhe të të burgosurve politikë.
Mesazhin Kaduku ia drejtoi kryeministrit Rama: “Viktor Hygo ka thënë se kur diktatura është fakt edhe pozicioni është detyrë. Ne nuk ikim nga këtu”.
Fatmir Merkoçi kujtoi përgjigjen e qytetarëve ndaj thirrjes së studentëve të 91-shit, të cilët mbushën sheshin si rrallë ndonjë.
“Një masë e madhe njerëzish të ndërgjegjshëm për çfarë po bënim, u përball me forcën më të madhe të shtetit. Ishte dita kur ne nuk përmbysëm vetëm shtatoren e diktatorit, por përmbysëm frikën”.
Si udhëheqës i 20 shkurtit ’91 Merkoçi mbështeti bindshëm kryetarin demokrat Lulzim Basha për thirrjen e kësaj lëvizje dhe vendimet e marra deri më sot. Thirrjen e rezervoi për popullin e Tiranës: “Na u bashkoni si në 20 shkurt 1991 pasi diktatura nuk njeh ngjyra partiake”.
Kreu i selisë blu, Lulzim Basha e PD-së: ” Jemi këtu sepse njësoj si para 26 vitesh bijtë e etërve duan të zëvendësojnë demokracinë e vërtetë me demokracinë fasadë. Demokracia fasadë është e keqja e të këqijave ndaj jemi mbledhur sot këtu në këtë ditë të madhe të madhe të përkujtimit të 20 Shkurtit, për të rinovuar edhe një herë mesazhin e madh popullor që dhamë tre ditë më parë: Se shqiptarët nuk do të pranojnë më demokraci fasadë, ekonomi fasadë, Parlament fasadë, shëndetësi fasadë, bujqësi fasadë, arsim fasadë. Se shqiptarët janë ngritur për demokracinë e vërtetë dhe lirinë e vërtetë dhe se kjo mund të arrihet përmes vetëm zgjedhjeve të lira dhe të ndershme”.
