Targat e automjetit të cilin përdorën autorët e atentatit ndaj Ardian Çapjas, mëngjesin e djeshëm në Elbasan rezultojnë të jenë të vjedhura një vit më parë në Krujë.
Automjeti tip “Volksvagen Sharon” u gjet tërësisht i djegur pas 15 minutash, nga atentati. Policia ka mundur që të dallojë targën e tij AA 821 MD. Nga veprimet hetimore rezulton se, targat janë të vjedhura dhe i përkasin një mjetit “Citroen C3” dhe janë deklaruara të vjedhura në Krujë një vit më parë.
Brenda automjetit është gjetur edhe arma e dyshuar që kanë përdorur atentatorët, një snajper i cili ka të dëmtuar numrin e serisë. Por ai është çuar në laborator ku ekspertet kanë mundur të përftojnë numrin e serisë dhe po bëhen verifikime për të kuptuar nëse është e regjistruar. Në mjetin e djegur, policia ka gjetur edhe një silenciator, i çmontuar, i cili do të dërgohet për ekzaminime të mëtejshme.
Aktualisht policia ka shoqëruar 20 persona që mund të kenë dijeni për ngjarjen.
Në momentet e para, pasi është dërguar në urgjencë, Ardian Çapja ka qenë i vetëdijshëm dhe ka thënë: “Jam rrëzuar në banesë. Në shpatull më ka hyrë një hekur, në momentin që jam rrëzuar. Nuk jam plagosur me armë. S’më vret njeri në shtëpinë time”. /Opinion.al
