Rudina Hajdari ka reaguar pas kritikave që iu bënë dje nga eksponentë të Partisë Demokratike në lidhje me mbajtjen e 1 minute heshtje në Kuvend për viktimat e demonstratës së 2 prillit 1991.
Hajdari është përgjigjur nëpërmjet një statusi në Facebook, duke thënë se partia që e kritikon, bëri pjesë të sajën Kastriot Islamin dhe pati në koalicion Lefter Xhuvelin, ish-anëtarë të nomenklaturës komuniste.
“Të kërkosh nderim zyrtar me heshtje në Kuvend për Martirët e Demokracisë nuk është fyerje por akt dinjitoz për ata që besojnë në vlerat demokratike. Ata që bëjnë sikur e duan shumë të djathtën duhet të kenë parasysh se me Gramoz Ruçin dhe partinë e tij kanë 28 vjet që bëjnë politikë.
Mos të harrojnë historinë se Z. Islami që ishte Kryetar i Kuvendit Komunist e kanë bërë pjesë të grupit parlamentar ndërsa me Lufter Xhuvelin kanë mbajtur koalicion. Drejtësi duhet të bëhet për Martirët e Demokracisë ashtu siç edhe për dhjetëra raste të rënda në Shqipëri të cilat kanë mbetur si gjurma në akull si shkak i politikës 28 vjeçare”, ka shkruar Hajdari në Facebook.
Dje Rudina Hajdari përpara se të niste fjalimin në Kuvend, kërkoi 1 minutë heshtje për katër viktimat e 2 prillit 1991. Deputetët e respektuan kërkesën e saj, ndërsa kreu i Kuvendit Gramoz Ruçi tha “U prehshin në paqe!”
Kjo nxiti reagime të shumta, ku ish-deputetja Izmira Ulqinaku tha se ishte turp që ai Parlament nderoi viktimat. Kujtojmë se Partia Demokratike akuzon Gramoz Ruçin si përgjegjës për vrasjen e katër të rinjve protestues, në atë kohë Ministër i Brendshëm i Shqipërisë./Opinion.al
