Hotelieri 53-vjeçar dhe djali i tij, 20-vjeç, të cilët akuzohen për vrasje me paramendim në bashkëpunim të shqiptarit Xhani Topalli dolën sot para gjykatës së Rodos, në Greqi.
Ndërkohë,disa familjarë dhe miq të viktimës janë mbledhur para gjykatës dhe në momentin kur kanë mbërritur dy të arrestuarit kanë bërtitur të irrituar: “Të kalben në burg”.
Komandanti i Drejtorisë së Parë të Policisë Dodekanez, ka tentuar të qetësojë familjarët e Xhani Topallit, ndërsa forca të shumta policie ndodheshin në zonë për të shmangur incidentet e mundshme.
Kujtojmë se, biznesmeni shqiptar, Xhani Topalli, 46-vjeç, babai i tre fëmijëve u gjet i vrarë në ishullin Rodos në Greqi më 6 shtator, i cili ishte zhdukur që prej datës 28 gusht. Ekspertiza mjeko-ligjore e bërë nga autoritetet greke tregoi se biznesmeni shqiptar vdiq si pasojë e 2 goditjeve të forta në kokë. Topalli u mbyt me litar nga 53-vjeçari grek, ndërsa djali i tij e ndihmoi që të fshihnin trupin. Ata pranuan krimin e rëndë, duke treguar detaje si ndodhi ngjarja. Shkaku që i shtyu drejt vrasjes së tij ishte një borxh rreth 100 mijë euro që hotelieri grek i kishte biznesmenit shqiptar./Opinion.al
