Një 32-vjeçar i shpallur në kërkim është vënë në pranga pasi akuzohet se është bashkëpunëtor i ngjarjes së ndodhur në datën 3 nëntor, ku disa persona tentuan të trafikojnë një sasi të konsiderueshme lënde narkotike nëpërmjet pikës së kalimit kufitare Hani i Hotit, drejt vendeve të BE-së.
Sipas policisë, është arrestuar 32-vjeçari me iniciale E.P., banues në lagjen Yrshek, Katund i Ri në Tiranë i cili dyshohet se ka ndihmuar Ervis Çallikun për kalimin e ngarkesës së kanabisit në Malin e Zi .
“Nga strukturat e Seksionit për Hetimin e Narkotikëve dhe Trafiqeve në DVP Shkodër, në bashkëpunim me DVP Tiranë dhe me Prokurorinë e Rrethit Gjyqësor Shkodër, falë punës së mirorganizuar, u bë ndalimi i shtetasit të shpallur në kërkim: E. P., 32 vjeç, banues në lagjen Yrshek, Katund i Ri, Tiranë”, njofton policia.
Për këtë shtetas, Gjykata e Rrethit Gjyqësor Shkodër, ka caktuar masën e sigurisë “Arrest në burg”.
Materialet iu referuan Prokurorisë së Rrethit Gjyqësor Shkodër, për veprat penale “Prodhimi dhe shitja e narkotikeve” kryer në bashkëpunim dhe “Trafikimi i lëndëve narkotike” kryer në bashkëpunim.
32-vjeçari është personi i katërt i arrestuar në kuadër të operacionit të koduar “Bozhaj” së bashku me drejtuesin e kamionit, Ervis Çallikut, Arlind Tabakut si dhe biznesmenit nga Lushnja Përparim Shurdhi./Opinion.al
