Sikundër paralajmëroi Lulzim Basha, opozita ka ankimuar në Kolegjin Zgjedhor “18 qershorin”. Sot është dërguar në Kolegj kërkesë-padia që mban firmën e Agron Dukës, aleatit të Bashës në koalicionin opozitar.
Sipas këtij ankimimi, opozitë kërkon që lista e dorëzuar për kandidatët për deputetë më 29 prill të shpallet e pavlefshme pasi janë shkelur afatet ligjore.
“Kolegji Zgjedhor do ballafaqohet së shpejti me kërkesën për të hedhur poshtë 18 Qershorin dhe listat e paligjshme. Do t’i japë një shans Republikës së Vjetër ta përfundojë misionin e saj përmes negociatave. Nëse Kolegji përmes presioneve vendos t’i thotë shqiptarëve se rrëzon këtë kërkesë, Kolegji do të merret përpara nga bashkimi i Republikës së Re” – tha Basha.
Nuk dihet se çfarë vendimi do të marrë Kolegji pas këtij ankimimi të opozitës. Në rast se do të rrëzonte regjistrimin e kandidatëve, procesi rihapej sërish nga e para.
Nëse Kolegji konstaton, siç pretendon PD dhe 3 anëtarë të KQZ, që afati ligjor dhe kushtetues i pranimit të listave shumemërore është shkelur, atëherë ai do ta bënte nul vendimin e KQZ.
Çfarë do të sillte një vendim i tillë?
Ekspertë të çështjeve zgjedhore shpjegojnë për lapsi.al se ky vendim do ta detyronte KQZ –në të kërkonte një zgjidhje ligjore për të vendosur një afat tjetër të pranimit të listave.
KQZ mund t’i drejtohet Kuvendit në këtë rast për të miratuar një dispozitë ligjore. Kuvendi do të mblidhej në seancë të jashtëzakonshme.
Kjo dispozitë do të të sillte si pasojë jo vetëm një afat të ri për pranimin e listave, por edhe zhvendosjen e të gjitha datave që kanë të bëjnë me zgjedhjet, të përcaktuara në Kodin Elektoral, përfshirë dekretin e presidentit për caktimin e datës së zgjedhjeve.
Vetëm pas një marrëveshje të mundshme Parlamenti do të mund të votonte ndryshime në Kodin Zgjedhor, në një seancë të jashtëzakonshme.
Pranimi i listave jashtë afateve nuk është teknikalitet, thotë PD. Është element kushtetues, shkelja e të cilit e bën nul procesin në çdo rrethanë tashmë.
Burimi: Lapsi.al
