Engjëjt janë larg”, një film i regjisorit të njohur Gjergj Xhuvani, u rikthye mbrëmë më datë 27 prill, në premierën e Tiranës, në kinema “Millenium”. Filmi trajton një nga ngjarjet më tragjike të historisë së shqiptarëve, që është lufta e Kosovës. Në rolet kryesore luajnë aktori italian Rinaldo Rocco dhe aktorja nga Kosova, Teuta Krasniqi, e komentuar në media si ishgruaje këngëtarit Blero.
Në premierën e filmit në Kosovë u përfol pikërisht paraqitja e aktores, e zhveshur dhe me skenat e saj erotike. Për mediat e Kosovës, Krasniqi u shpreh: “Nuk ka qenë një rol i lehtë. Ka qenë një këndvështrim sfidues. Sapo roli m’u ofrua, nuk kam pasur asnjë dilemë. Ishte diçka që e kisha pritur prej kohësh”. Kur gazetarët kosovarë e pyetën për skenat erotike, aktorja u shpreh se ajo është aktore dhe spektatori që ka shije artistike e kupton. Ishte pjesë e personazhit dhe pa këto skena erotike nuk mund të kuptohej historia e Hanës. Filmi me regji të Gjergj Xhuvanit flet për marsin e vitit 1999, kohën kur NATO bombardonte në Kosovë. Eksodi shqiptar filloi gjatë kësaj kohe. Terrori, frika, pasiguria dhe uria e pushtuan sidomos Gjakovën, që ishte në kufi me Shqipërinë.
Një ishprostitutë dhe një prift katolik. Dy rrugë që takohen në kohë të vështira. Në mes të luftës së Kosovës 1999, Mario, një prift italian, refuzon të braktisë jetimët, për të cilët kujdeset në një jetimore në Gjakovë. Përtej Adriatikut, Hana (Teuta Krasniqi) shumë tërheqëse, braktis jetën e saj si prostitutë dhe merr rrugën për në zonën e nxehtë të luftës në kërkim të vajzës së saj. Kur Hana arrin në jetimoren e Marios, ajo bëhet një nënë për fëmijët e tronditur nga lufta, ku një tërheqje lind midis saj dhe njeriut të Zotit. Në film marrin pjesë dhe aktorët e njohur, si Ndriçim Xhepa, Nik Xhelilaj dhe Fatmir Spahiu. Ndërkohë që skenat e filmit janë xhiruar mes Kosovës, Shqipërisë dhe Italisë./Panorama/
