Aktualitet

18 dhjetori i PD, Referendumi dhe Kuvendi, përplasja Basha-Berisha


Bëhu pjesë e Grupit Zyrtar të Opinion.al
>> KËTU <<
               Publikuar në : 08:22 - 18/12/21 |
Opi Nion

Kjo e shtunë duket se është një ditë e rëndësishme për Partinë Demokratike. Kreu i PD-së, Lulzim Basha mbledh sot delegatët e Kuvendit Kombëtar, ndërsa nga ana tjetër ish-kryeministri Sali Berisha zhvillon referendumin për shkarkimin e Bashës nga anëtarësia e partisë.

Në kuvendin e thirrur nga Lulzim Basha, pritet të votohen ndryshimet statutore si: të mos ketë individë të shpallur “non grata”në struktuarat e PD, krijimi i Aleancës Qytetare për Demokracinë si organizate partnere e PD-së, siç është FRPD dhe Forumi i Gruas.

Ndërkohë në Pallatin e Kongreseve janë ngritur Komisionet e verifikimit të mandateve të delegatëve,  proces ky që po zhvillohet në hollin e pallatit të Kongreseve me kartë anëtarësie dhe kartë identiteti.

Kujtojmë se mbrëmjen e djeshme PD zhvilloi mbledhjen e kryesisë, ku PD emëroi 12 kryetarët e rinj të degëve në PD, pasi u shkarkuan nga kryesia, sepse nuk u angazhuan për Kuvendin e 18 dhjetorit dhe mbështetën kuvendin e thirrur nga Sali Berisha.

Po ashtu u ngrit edhe Komisioni i Përhershëm Statutor. Anëtarë të këtij komisioni janë Enklejd Alibeaj, Ervin Salianji, Kreshnik Çollaku, Jonila Godole, Taulant Zeneli si dhe Jorida Tabaku.

Ky Kuvend vjen vetëm një javë pas zhvillimit të Kuvendit të Berishës më 11 Dhjetor, ku u shkarkua si kryetar i PD-së, Lulzim Basha.

Ndërkohë rendi i ditës i Kuvendit të 18 Dhjetorit është si më poshtë:

“Vendimmarrje mbi situatën politike, si edhe marrjen e masave për të mbrojtur interesin e PD-së, duke mos lejuar që problemet apo interesat personale të secilit anëtar të dëmtojnë interesat elektorale dhe politike të PD-së dhe axhendën e saj politike në përballjen me regjimin e Edi Ramës.

Miratimin e aksionit politik për të ardhmen e Partisë Demokratike dhe shpalljen e platformës qytetare për demokraci, për rikthimin e legjitimitetit dhe demokracisë në vend, si edhe ndërtimin e mekanizmit të bashkëpunimit me të gjitha forcat e shoqërisë në përballjen me regjimin e Edi Ramës, i cili në aleancë me krimin e organizuar, ka shkatërruar çdo mjet të funksionimit demokratik të shtetit shqiptar dhe po nxit braktisjen masive të vendit, kryesisht nga të rinjtë.

Miratimin e programit organizativ të Partisë Demokratike për të përgatitur strukturën e partisë për zgjedhjet e ardhshme, sipas objektit ‘Partia Demokratike, partia e demokratëve dhe çdo shqiptari të ndershëm – Forca e vetme politike që do të sjellë ndryshimin në Shqipëri’”, thuhet në rendin e ditës./Opinion.al

 

Pas