Qeveria ka hapur 17 gjyqe ndaj politikanëve të PD-së për shpifje. Në një postim herët në mëngjes në rrjetet sociale Kryeministri Edi Rama shkruante se me paratë që do fitohen do bëhen investime në shkolla.
“17 çështje gjyqësore me Fabrikën e Shpifjeve tanimë në proces. Për 10 prej tyre pritet vetëm përcaktimi i datës së gjyqit. Të shohim a do nxjerrin prova a do nxjerrin lekë për të blerë libra për shkollat. 44 çështje të tjera janë rrugës për të hyrë në proces e shkuar deri në fund”, shkruan Rama.
E një nga deputetet e PD-së që do përballet në gjykatë është dhe Jorida Tabaku. Kjo e fundit ka reaguar ndaj postimit të kryeministrit duke theksuar se në seancën e 20 marsit do shkojë në gjykatë me argumente e prova.
Ndërkohë një rishikim i tetëmbëdhjetë çështjeve gjyqësore që mbartin veprën penale të shpifjes dhe që janë shqyrtuar nga Gjykata e Lartë, tregon se në trembëdhjetë raste, përplasjet mes politikanëve të maxhorancës dhe atyre të opozitës kanë përfunduar gjithmonë me fitoren e maxhorancës. Po ashtu Rama rezulton edhe politikani që ka ngritur më shumë akuza për shpifje ndaj kundërshtarëve të tij politikë./ Opinion.al
