Grupi parlamentar i Partisë Demokratike iu përgjigj të hënën unanimisht propozimit të Kryetarit të partisë Lulzim Basha për djegien e mandateve të deputetëve. Këtij vendimi iu bashkuan dhe aleatët e tjerë të partive të vogla të së djathtës, dhe në mbrëmje edhe Lëvizja socialiste për Integrim, forca e dytë më e madhe e opozitës.
Gazment Bardhi në Opinion: “Në përputhje me procedurën ligjore, kjo do të konkretizohet, sigurisht pas vendimit të strukturave ligjore të partisë në heqje dorë individualisht të cdo deputeti amëtar i grupit parlamentar i Partisë Demokratike”.
Dhe sipas Kodit Zgjedhor, ashtu siç ka deklaruar dhe zoti Gazment Bardhi dorëzimi i mandatit bëhet në Komisionin Qëndror të Zgjedhjeve në mënyrë individuale dhe jo “në bllok”. Pas procedurës së dorëzimit të mandatit, KQZ shikon zëvendësimin e deputetëve që lanë mandatin me kandidatët që nuk fituan në zgjedhjet parlamentare të qershorit 2017. Lista e PD rezulton të jetë më 194 kandidatë, nga të cilët fituan vetëm 43, që do të thotë se ka 151 kandidatë që mund të zëvendësojnë 43 të larguarit.
Kodi Zgjedhor parashikon që nëse asnjë prej tyre nuk pranon mandatin duke iu bindur vendimit të PD, atëhere 43 deputetët opozitarë zëvendësohen me kandidatë nga lista e PS. Por ky skenar nxjerr problem cilësinë e qeverisjes, që ulet ndjeshëm në një parlament ku opozita ose nuk përfaqësohet ose përfaqësohet fare dobët. Po ashtu për 151 kandidatët në “listën e pritjes” mund të ketë dhe supriza.
Gjatë emisionit “Opinion”, gazetari Alfred Peza hodhi dyshime se një nga kandidatët e PD-së, zoti Lefter Maliqi, i cili është në listën e PD-së mund të pranojë mandatin e deputetit. Ky i fundit mban postin e zëvendësdrejtorit të Përgjithshëm të Burgjeve. Megjithatë, koha do të tregojë çdo gjë! G.F/ Opinion.al
